QUEI SFRIZONI DA ‘NAMORAI

QUEI PRIMI SFRIZONI DA ‘NAMORAI

foto4034

di Cornelio Galas

Ani e ani senza gnaca savér

a cossa che ‘l serve el sciàmpo,

taiàrse le onge de le mam

sol quando le era zamai nere.

Ani e ani senza dropàr profumi

e nar for de cà … vestìdi

con quel che se gatéva al vérs.

Po’, de colp, e se sa ‘l perché,

quel bocia semper slandróm

‘l scomìnzia a star al ‘spègio.

El se varda, el se varda ancora,

e n’altra volta, anca de sbiéch.

El se lava, el tira via la spùza,

toh, el se mete el vestì bel.

Che stasèra, varda ‘n po’ tì …

el va ‘l cine co la Lorenza.

Sì, la Lorenza, quela putèla

che a scòla l’è su en zima,

prim banch, denor a la lavagna.

Sì la Lorenza, che l’è da mesi

che la và de quei biglietìni.

E alora stasera, a l’Oratorio,

i starà vizini, vizini, vizini …

No l’arìva però ‘sta putelòta,

passa i minuti, i sèra la cassa.

E lù no ‘l sa pu cossa far,

e lù no ‘l sa pu cossa dir.

El strénze i soldi che i gà dat i soi:

“Và e divèrtete, sàpiene dir,

oh, finì el cine, drit a ca’ neh”.

Lù ‘l spèta, ‘l spèta ancora,

po’ el buta l’ansia nel magnar.

En tòch de piza, na Cocacola,

ma no pàssa quei sfrizóni

che zamài i ha serà ‘l stómech.

Via alora, tra le gambe la cóa,

e ‘n brut saór che no va via.

Via alora, propri come quei

né fodrài né embastidi,

come n’asola senza botom.

Drìo la statua del Mosè …

Quando l’è squasi a cà,

eco che ‘l vede la Lorenza:

no, no l’è sola: chi elo quel lì?

Ma l’è ‘l Bruno, quel dela B,

quel che prova, el ghe prova

con tute le putele …

“Va bèm, va bèm … tanto,

tanto quel cine de stasera

prima o dopo, zamai se ‘l sa,

i lo meterà anca en televisiom”.

Questa voce è stata pubblicata in Senza categoria. Contrassegna il permalink.

Lascia un commento