di Cornelio Galas
Cari amizi de Televignole benvegnui ala prima ediziom del nós telegiornal. Se no ‘l vedè bem, se vedé sul vos compiuter o su la vossa televisiom tante righe ciare e scure che bala … no so cossa dirve, forsi l’è el caso de cambiar compiuter e televisiom perché noi trasmetem su la banda larga miga su quela streta…
Alora, scominziem da le notizie che no le pàr gnanca vere da strane che le è:
Domam – così almen dìs en comunicato dela Provincia – l’asesor ala sanità del Trentim Luca Zeni el vegnirà zo a Arco per en corso de agiornament. Oltre ai medizi e ai infermieri de l’ospedal è envidà tute le done che sta spetàndo en fiol (o na fiola o gemei se sa) con anca i so maridi. Ghe sarà spiegà a tuti entant come se salta su e come se vei zo da n’elicotero. Po’, cossa far se se rote le aque e s’è magari per straa. E ancora, come taiar e cosir el cordon del botom dela panza e tante altre robe che bisogn saver. Tut agratis neh.
Semper su i casini dela sanità gh’è n’è n’altra de bele. Vizim a l’ospedal de Arco i carabinieri i ha fermà quela che paréva n’araba col burka. “Ferma lì, ‘sa fàt da ste bande?” – Tira, buta, mola i gà fàt tirar via el pastràm nero e tut quel che scondéva la facia. Cramento, no èrelo proprio l’assessor Zeni …
N’altra notizia. Propri de sti ultimi 35 ani neh. Fresca fresca diria. El treno tra la Busa e Lopio l’è ancora blocà ala vecia staziom de Riva, per dir, dove gh’è el prim toch de sìne. Tut colpa dei ambientalisti stavolta. No ghe piàs el color zalt come el pis. i voleria en vert pistachio. E poh – anca dopo quel che ha deciso el Parlamento per la liberalizazion de l’hashis – no se se trova gnancora d’acordo: quante cane sul treno? Una, doe, quatro al massimo? De pù tut mal no perché magari a qualchedum che vei la poia.
Casini enveze tra Perzem e Bassam stamatina. Sul posto pompieri, stradini, guardacaza, e anca esperti per risolvere el problema de la Val d’Elastico. Par che l’elastico el se sia rot propri a metà tra Trentim e Veneto. Tut colpa – i dis – del tira mola, buta, lassa.
A Trent la Provincia la volerìa darghe de ritorno i tereni espropriai per far su la zitadèla dei militari. En pratica i contadini i dovrìa darghe de volta i soldi per riciapàr quel che i ha zà e temp vendù. Uno el gà dit: “Magari volerésse anca i enterèsì neh? Ma baséve el cul valà, che con quei soldi ho zà mess su n’agritur diaolporco, no gò pù vòia de nar drio a quela campagna …”.
Adès i ròba en casa a trédese ani. No vedo perché ste robe le deva finir sui giornai, osc’ia. Mi ho scominzià, propri en casa, a robarghe ciocolatini a me fradèi zà a sei ani neh.
