STRUDEL TRENTIN

SAORI,

EL STRUDEL

DE POMI

Dirè: oscia vot che en Trentim no sente boni de far el strudel de pomi? Digo: e alora perché i pu boni te i trovi semper su dai todeschi? O en quele famee che è vegnù su co le ricete dele none e dele bisnone (che le era soto i todeschi)?

A ogni modo na rinfrescadina la ghe se vol. Serve (per magnar en quatro): trezento grami de farina, zinquanta grami de zucher, late (no etolitri), n’of, setantazinque grami de buro, sal e ancora en po’ de buro da tegnir en banda, dopo ve spiego perché. Po’ en po’ de uva pasìa. Canèla. Scorze de limon. Rum o sgnapa vizini. E ghe se vol, se sa, i pomi. Quanti? Entant portei chi tuti quei che te gh’ai… Ve digo subit che la và en po’ per le longhe. Ensoma no l’è che podè far el strudel entant che i è drio a magnar el secondo. Ghe se vol el so temp…

Ciapè la farina. E fè ‘n mucièt co ‘n bùs en mez, tipo vulcano col bus en mez, tipo…ensoma en mucio de farina col so bus en mèz ‘cramento. Nel bus buteghe el zucher e ‘n bicièr de late tepit, l’of (che avrè spacà prima), el buro (che avrè fat entepidir n’atimim) e na presa de sal (do dei che tol su el sal e po’ ‘l lo mola).

Nar che nare. Mover bem le manote. Oio de gombet. Empastar, ancora, empastar. Vara che mi a la to età en fevo anca zinque strudel en de na sera…dai oscia, moverse, e su e zò sta pasta fin che la vei mola, lissia, come quele che i dropa per far le pize… sì ma se te te fermi a risponderghe a quel che te ciama sul telefonim ciao fighi…dai che no la va bem cosita, n’altra bela remenada.

Te par che la sia a posto? Bom. Alora meteghe su na pezza e lassala lì per mezoreta che la polsa. Ti però, zamai te l’avrai capì co ‘ste ricete che no se pol star mai co le mam en mam, tì disevo no poi però polsar. Via coi pomi. Quanti? Entant scominzia a lavarli, a sugarli, a torghe via le scorze e ‘l torsol (co l’agegio che avrè zamai comprà per do euri per far le fritele no…). Fete fine. Zò tut (le fètele de pomi) en de na padela dove gh’avè mes prima el buro. Fele rosolar polito. Ho dit rosolar no enfumegar la cosina, no brusarle diaolporco.  Feghe far a tuta ‘sta roba na bela sfritegada. Che vaga su el fum: bom l’odòr ah? Vedrè che dopo se magna con pu gusto.

Te l’hai snasà el strudel… l’è come se te avessi fat l’amor co ‘sti pomi de la padela. Dai, che no l’è finia. Zò do cuciarini de rum o de sgnapa. Sfrusss. En po’ de zucher (bastaaaa ‘cramento che te gh’ai la glicemia alta), po’ grata zò le scorze de limon (fermeteee che no l’è el strudel al limon ma de pomi). E adès en po’ de canela en polver. Bom cosita. Che no l’è el strudel ala canela, ma el strudel de pomi oscia.

Ela passada la mezoreta? Bom, tira fora la pasta. Tirela per el lonch e el larch. Meteghe denter quel che t’hai scaldà nela padelota en banda (quel co la canela, el zucher, el mister de l’ombrela…el rest). E po’ dale bande enrodola tut en modo che vegna fora na roba bislonga che tegna denter pomi e condimenti vari,

Nel forno, nela parte soto del forno (o vot scotarte?) meteghe el buro che t’avevo dit (te l’avevo dit neh…) de tegnir en banda. Po’ denter el giom de pasta. Faghe do tre taieti dal de sora. Così no ‘l sciopa. E bagnelo co ‘n po de lat. Na spenelada. Po’ taca el forno: zentotanta gradi per na zinquantina de minuti. Daghe n’ociada ogni tant. E quando vei fora el so bel sughet de pomi spenèla tut de nof. Magari varda che no ‘l se taca zo…alzelo n’atimim ogni tant.

Ensoma staghe drio al strudel en ‘sti zinquanta minuti. L’è n’atimo che ‘l vaga a farse ciavar. Finì? Te par che ‘l sia pront? Tirèlo fora. Spolveradina de zucher a vel. E via che el vaga… Cossa beverghe drio? A mi quei che ne sa de pu i me dis: en moscatim zalt. Coca cola, acqua gasada, tè ala pesca? Barea. Meio farse vegnir sé.