SPAREGNAR

di PAOLA CARLIN

En de sti tempi de crisi la parola d’ ordine l’ è “sparegnàr”! L’ è fàzile da dir, l’ei anca fàzile da scrìver ‘sta parola, ma ‘n pratica envèzi par quasi n’utopia!
Mi tuti i mesi gh’ò i me bòni propòsiti: sto més en vanzo, SPARAGNO.
Però, se sa ben che le spese come ‘n tute le famiglie le è tante: l’ afìt bisogn pagarlo tuti i mesi come anca altre spese fisse. E fin chi va tut bèn.
Gh’è anca la màchina da mantegnìr … Pàga el bol, l’ asicurazión, mèteghe zo benzina, revision, sperar che no la se rotia e che no la perdia i tòchi per strada.
E adès vèn fret e bisogn empizar el riscaldamento e vedrè che salasàda sule bolete. E pò gh’è la boleta dela luce che la ne fa vegnir vòia de viver al stroff.
Pò me ven en ment che gh’ò anca tre fioi, pù o men adolescenti. E i magna, acidenti quant che i magna. E i vol nar en giro vestidi decentemente, anca se per fortuna se ricicla i vestidi con le amiche. E perché le scarpe le è sempre sbusade? ‘Sa ghe fe a ste scarpe mateloti? Vabè, nen per scarpe nòve.
E pò fòr soldi per la scola, per le gite, per le ricariche telefoniche, per el sport, per l’ abonamento de l’ autobus, per i buoni mensa e per tante altre robe ancora …
Ogni tant l’ è anca bel nar a magnarse na pizòta con i fioi e con i amizi; diria che l’ è soldi spesi ben quando se passa na serata spensierada en bela compagnia.
Ma si valà, hò capì che no se riesce a sparegnar.
Ma no me sto lamentando, ghe mancheria. Gh’ò la me bela famigliola, el me bel laoro (en den settor che no narà mai en crisi), la salute (pù o men), tanti amizi (alcuni anca con la A maiuscola). La ròba importante l’ è poder èser sereni, saverse acontentar e vardar sempre avanti …
E endó che gò el cont en banca ghe digo: “portà pazienza che luni l’è el 27”.