SAORI, SALZIZE (LUGANEGHETE) EN UMIT

Sarà perchè la sposa la m’ha mess en marlòss sul frigo. Sarà perchè va ben perder chili ma gh’è anca robe bone che dubito de trovar … de là dove no se sa de finir. Sarà perchè l’è ‘n pèz che strangosso. Ma oscia che voia d’en bel piat de “salzize” (dete anca luganeghète).
E che bone fate en ùmit come le feva me nona.
Voi che podè, fèle anca per mi. Tanto en Internet no sento el profumo. Se però ve ‘nvanzès qualcheduna magari lassemela en d’en sachetìn co la carta de alumini da qualche banda che quando la sposa la va zo a Arco dala Deborah a farse meter a posto i cavei …
Bom, per sei che magna (pu qualcos da meter nel me sachetìn) ghe se vol:
Dodese salzize fresche (o meio sei pàri de salzize, ligàe per el col come i probusti)
Na man (grossa) piena de salva o rosmarin
En cuciar de conserva (o passà) de pomodoro
Tre bicieri de aqua
Tre bicieri de vin (meio quel bianch, ma anca el rosso el se làssa)
No serve tant oltre ale salzize no?
Quant ghe meterè a farle? Tre quarti d’ora e denter gh’è anca el temp per coserle.
Pronti, via. Che stavolta no gh’è gnanca tant da misciar e far nar le mam.
Ciapè le salzìze e metèle zò en tondo, che le faga en girotondo doe a doe una contro l’altra en d’en padelom, Ocio: sbusèle ste salzize qua e là con ‘n piròn (se no le sciòpa dopo …).
Zò acqua e fèle boìr. Quando l’acqua la è boida butèla via (l’acqua, no le salzize) nel lavandin vizin … oscio a no scotarve.
Alora le salzize le netè soto l’acqua del rubinet, del secièr. E rimetèle zò semper col sistema el girotondo, prima però sul font del padelòm metèghe qualche foia de salvia o rosmarin. No ensema però. Prima la salvia meti. Po’, dopo ‘n po’ el rosmarin o viceversa. Capì come?
Adès cuertè tut con aqua e vin bianch: disente mez e mez. E fè coser piam piam. Sora el padelòm metèghe anca en cuercio. Dopo na desìna de minuti tirè via el cuercio e metè nel padelom el pomodoro. E ancora piam piam cola fiama bassa. Ogni tant zò el vin. Bisogn star atenti che le salzìze no le se brustola. Quando vedè che le gà en color dorà (le deve esser mole ma anca crocanti ensema) podè tirarle fora. Arènt? Na bela polenta co la farina de Storo. O anca en bel purè de patate.
Cossa beverghe drio? En sauvignon sarìa el massimo. Ma anca qualcos che costa de men. Basta che no sia slavarìè o vin fat co le bustine.
Magnè, magnè … che en dì o l’alter la sposa la ve sera la cosina anca a voi, diaolporco …