QUEI SGRISOI SU LA SCHENA

Me son ‘nsognà,’ sta nòt

che na vecia, sdentàda

patìa, tuta pèl e òssi,

la vegnìva piam piam

da l’altra banda de me lèt.

Po’, de còlp, come ‘na màta

la tirèva fora ‘n lumìn

e con quel la scaldeva

en toch lonch de fil de fèr

fin che ‘l deventèva ròs.

E … ahia, che scotàda,

che sbrusòr su la me schèna.

“Adès – l’ha dit sta veciàza –

te ‘l sài, el gh’è scrìt

quando te finirai de viver”.

No ve digo la matina

quando me son po’ levà.

Tut en sudòr, calt e frèt,

me digo: son demò malà.

Anca la sposa la me varda:

“Tei, stà lì zamài valà:

‘dès misuren la fèver

e ciàmo subit el dotòr, valà”.

Me remèno tra i linzòi,

sento sgrisoi, vardo l’orolòi:

oscia, manca poch a mezdì

e … sto brusòr, semper lì.

“Vòltete n’atimo, così, en costa,

che te cambio la canotièra …

t’hai sudà dal bon su ‘sta letèra”.

No – ghè fago ala me dona –

per amor de Dio stà ferma,

se te vedi quel che gh’è scrit

è finì la me primavera.

La me varda, la scorla la testa

e la se mète po’ a rider:

“Vàrda ti dove l’era finìa

la spazolèta per el cagnot,

credo ben che su la schèna

te gh’ai spiza da sta nòt …

vàra vàra, è restà i segni

parerìa dei numereti …”

Ferma lì, ciapà na spugna

ah ‘n do ei i zigarèti?