EL SALAM DE CIOCOLATA

Gh’avè scatole de biscoti ancora mèze avèrte da prima de Nadàl? Gh’è tochèti de biscòti vanzài che nesùni vol tòr su a colaziòn? Alòra è ‘rivà el moment de far el salàm de ciocolata. No gh’avè vanzaròti de sto tipo? Nè a comprarli i biscoti : va bèn quei sèchi, no per capirne i Ringo, o quei mòì, co la crema …

Per quatro che magna (tuti nela stessa maniera, no quatro slapazuchi) ghe se vòl: do ròssi de òf (butè via la ciàra), quatro cuciàri de zùcher, n’eto de buro, tre cuciàri de cacao amàr. en bicierìn de sgnapa (o de rùm), do eti de quei biscoti sèchi che ve disèvo.

Bòn. Zò nel piàt alt e larch i do ròssi de of. Zò anca el zucher (doi dei quatro cuciàri). E come semper  via co le manòte, menàr el mestol, meio el piron, che vegna fòra na bela crema. En banda entant avrè zà colà (no farlo fritegàr, .no dovè miga còser gnente neh …) el buro e spacà sù a tochetini (picoi, no tochi grandi) i biscoti. Eco, alora denter nela crema el buro colà, i altri do cuciàri de buro, el cacao, la sgnapa (o el rum. Po’ quando tut s’è mscià bem, denter anca i biscoti. E n’altra bela svoltolada. Che ghe sia ensoma màcie bianche de biscoti en po’ dapertut.

Eco, adès fora la carta olìata (che no vol dir con su l’oio … l’è quela trasparente che i vende dapertut). En mèz tuta sta pasta de biscoti, ovi, zucher, cacao e tut el rest. E fe sù tut come se dovèsse encartar na caramela grossa. Co le so bele reciòte dale bande. Tut nel frigo almèn per n’oreta. Che el deventa dur (no ocor congelarlo neh). E po’ via col cortèl a taiàr zò le fete de sto salam dolz.

Cossa beverghe drio? Moscato del nòs. Ma anche spumantini, bolicine, meio vin bianch sech, no dòlz (che no se tàca al dolz). Ah, el salam de ciocolata no ‘l va mès ne le ciopète. Me racomando … lì ghe và el salàm vero, la bondola, altre robe.