No gh’è rispèt per i altri !

di Milena Pisoni

Son chi stanot a laorar come tante altre nòt. Ma stanot me ven da rider.

No gh’è rispèt per i altri!

Apena rìvada el me veciòt, tut content de vedérme, el me conta come l’è nada la nòt pasada. El me dìs rabios che el vizin de let la nòt prima l’ha fat fracàs e l’ è deventà mat.

No gh’è rispèt per i altri !

Po’ scopro envezi che l’è sta elo a dar de mat, alucinaziòn, stravagni. La fiòla del vizìn mentre la néva via, tuta cativa e col nas en su, l’ha m’ha dìt: “sta not la véda de farlo dormìr! “; come podrònte mai farlo? Ghe meterò en stropol en boca, ghe darò ‘na legnada zo tra le rece, che po’ i me sèra via, g’ho pensà!

Ven le dése de sera e par de esser en piaza, ciàcere tra la zènt de fòra dela camera, che non le finìs mai.

Vèn le ondese, el me veciòt el vorìa dormir ma gnènt, i enferméri ancora i ciacera de le so storie, dei coleghi che i va a far i tapa busi, dele ore de laoro e de monade, che i m’ha fat sentìr ma avrìa preferì de no. Po’, eco, el vizìn che el taca a lamentarse, no ‘l capìs en do che l’è, ‘ntànt el me veciòt tut tranquilo el lo varda e el se lamenta del rumor che el fà.

Po’ gh’è la fiòla che quando la lo sente tàser la ‘l ciàma per vardar se el ghe risponde. Ma elo posibìl che elo el tase e ela la ‘l desmìsia ? No ghe sen, no ghe sen propri.

No gh’è rispèt per i altri !

Sen a mezanòt, porte che sbate, ma no i pol compagnarle? I sèita a rider e scherzar come al bar el sabo. En veciòt el se lamenta che no se pól far tut sto gazèr ma no i lo scolta de manco.

Pensévo che fussa na nòt da tiritèra ma envèzi me sto anca divertendo. De sicur no podrìa mai endormenzàrme, tra el me veciòt che el ciàcera anca elo, el se lamenta anca del vizin che el stravàgna. Vegno a savér che a somenàr pazìa l’è sta en farmaco; el dì prima i ghe la dat al me veciòt e sta not al vizìn de lèt, i se pasa i alucinozeni.

Che nòt strana. Non m’è mai capità en tal teremòt.  L’è le doi e par che le ciàcere le scominzia a calàr; i se sarà stracadi ? L’è durada pòch! Sti lazaroni, envezi de lasar dormir sta pora zènt, i taca a empienìr  de acqua la machineta del cafè che l’à sèra enciodàda, i sèita a mèter en mòto el motor ma gnènt, no ‘l vol capìr de nàr.

I gavrà provà na desina de volte ma gnènt! Me domando: ma se te vedi che no la va ala seconda, terza volta, ma che te contìnuit a ruscàrghe drìo?

No gh’è  rispèt per i altri!

Ale quatro el vizìn ancora el stravagna e la roba divertente l’è che el brontola del mé veciòt perchè el ronzega. L’è come dar del béch a l’asen!

Oh malediziòn! Dopo aver ciacerà tuta la nòt, aver ridèst, zopelà, sbatù porte, azionà machinete che no va, adès i enferméri i pasaa  a tòr la féver. Ma propri adès? No i g’ha tèmp dopo?

Ale zinque se sente i oseléti  zinguetàr e … e … e sti chi i passa a far el giro dei lèti. Se uno l’è malà el scampa da sto ospedal, no se dorme mai!

Non gh’è rispet per i altri!

El me veciòt ormai l’è desmisià e el fa ginastica cole gambe e entant  el se lamenta che no l’è sta bòn de dormir. A mi me vegn da rider. El ciàcera, el ciàcera mentre de fòra el deventa dì, el vizìn el s’è calmà e per mi l’è ora de stacàr e tornar a casa.

Ricordéve che chi no se dorme mai … nessun dorma!