di Cornelio Galas

16 agosto 2017

-Vist? Te l’avevo dìt o no?
“Cosa?”
-Che la storia de l’ors la se sgionféva …
“No dirìa neh”
-Envèze varda, gh’è su qualcós ancòi sui giornai de l’ors? Gnent …
“Credo bèm, el dì dopo feragóst no i gh’é mai i giornai. Ma miga da ieri neh”.
-Varda che secondo mi l’è perché no i savéva pù cossa scriver osc’ia. I ha sparmià carta e tut el rest.
“Te me pari màt …”.
-Ma se paréva che quei che la gavéva su coi trentini, oltra che col Rossi, perché i ha copà que l’orsa, i nèva su a far casìm …quanti èrei ala fim? Na vintìna compresi i bòci? Quatro machine con su i cartei che ne dà dei bastardi anca a ti e ami che no avém mai copà gnanca na mosca?
“Ma sì, però dai … copàr l’orsa en quela maniera. Tanto pù che adès i pensa de portar via i orsi en de pù, quei rognosi, che i l’ha capìa ensoma come far…”.
-Varda che ‘l l’ha dìt anca el Rossi sui compiuter neh: “Dème pur del mona a mi se ve fà star meio, ma no sté darghe dei bastardi a tuti i trentini per carità…

“I dovéva pensarghe prima, cramento. Toh, prova anca ti su Gugle. Te schizi Trentino e te vei fòra orsa copàda. Capìssit come? No l’è che te vèi fòra Dolomiti, Aquila basket, che ‘n sònte mi … autonomia, magnadora alta … no, te vei fòra orsa copàda. Te me capìssi bèm …con tuti i soldi (dei nòssi tra l’alter) che la Provinza la spende per far la reclam …”.
-Sì, te gài bem resóm per quel, ma, digo, cosa fai da altre bande? I todeschi se sol n’orso dei nòssi el va a róterghe le bale te hai bem vist cosa che i fa no? No i stà miga lì gnanca a perder temp a far le carte. Bum. E dopo qualchedum fa anca festa co le mortadéle de ors e la bira. E che nesuni se risc’ia a dirghe qualcos neh. En Romania, toh, varda chi la foto, le luganeghe de ors te le trovi ensema a quele de rugant … magari le costa anca de mem. E quando gh’è qualche leóm, qualche tigre che s’è còt el zervél al sol? Varda che no i và miga lì a dirghe de far polito neh?

“Ma ti te parli sol per darghe aria ala boca dai. Ch’en sàt ti de leoni e tigri, dai per piazér…”.
-Alora te fàgo n’alter esempi. Te ricordit quando le volp le gavéva la rabia? Bem, ai cazadóri de chi i ghe deva me par zinquemili lire se i ghe portéva ai veterinari na volp copàda. Una en mem, cramento. Così i ragionéva sti ani. Po’ i ha zercà de meterghe le trapole coi vacini. Ma secondo tì perché se dìs che um furbo l’è na volp? Perché no ‘l se fida no? Perché ‘l capìs prima dei altri se te voi ciavàrlo…
“Sì, per quel, te gavrési anca resóm, però …”.
-Però cossa? A so temp – varda che som vegnù su en de na famea de cazadori neh, l’ho vist coi me oci – se te ghe portévi al farmacista na vipera soto spìrit … te ciàpevi soldi anca lì. Perché i ghe cavéva el velem …per far no so cosa, ma entant te ciapévi soldi. E dopo la vipera miga i la moléva de nof nei boschi neh: na bastonada e su ala chipa dela Maza…

“Altri tempi, varda che l’è cambià el mondo entant …te sei vecio bacuco”.
-Sarò anca vecio e bacuco ma quando quei che dìs de volerghe bem ai animai i è nai zò a Varóm a far casim contro la festa de polenta e lumàzi … me cascà i bràzi dai.
“Eh ma l’è el modo che i dropa a tegnirli a spurgar nele gabiéte me sa …”.
-Ma valà che sem zamai tuti for de testa. Domam sti chì i và a far casim anca contro i bìgoi co le aole … pam e bondola (che se sà no che quei de la Bacionela che no ha firmà el modulo anti-fasista i s’è mési per so cont su la lista nera), la porchéta de S. Andrea, el polo al spiedo del mercol al mercà …che anca i boci i vede sti pori poli girar sul foch cramento.

“Se parleva de orsi, no de ste robe, sta calmo, no sta pisàr for dal vaso…”.
-Ma dai che m’ha fàt n’oservazióm anca me neó l’alter dì sul pontesel…
“Su cosa? T’avrai dit una dele to monae…”.
-No, gh’era n’àf che seitéva a girarme entorno … semper pu vizina ala facia. Ho ciapà na paléta de quela per le mosche e … l’ha fat na bruta fim. Varda che zamai st’istà gò ciapà su la mam per ste robe…
“Va bem e che casim è vegnù fora con to neó?”
-Ah so bem tant mi cosa che i gh’ensegna ades a scola. El m’ha dit che le àf l’è na specie proteta che no bisogna farghe del mal…
“E ti?”
-Mi gò dit: “Pòpo, varda che mi ho vist portar via co l’elicotero uno che aveva ciapà en becóm da n’af. E quando sto chì l’è vegnù de volta da l’ospedal te dovévi vederlo come ‘l ghe tendèva ale af … ma miga per darghe na mam a far el mel neh.

“A ti bisogn semper darte resom anca se te sbàri robe che no gà senso … ma cossa ghe z’entra le àf, i lumàzi, co sta orsa copàda … e che l’ha lasà anca i pìcoi che no se sa pù dove i sia dai …”.

Ma l’è per farte capir, osc’ia, che zamài se tèi cònt sol de quel che la sbàra pu grossa. Se quei de la Provincia, per motivi che forsi sà sol lòri, i ha copà quela orsa, no se pòl tòrsela con tuti i trentini. Che ‘n sàt ti cossa avrìa fat mi con que l’orsa se la me saltéma adòs? Magari scapévo de bàla. Ma magari, stremì, avrìa podù anca tirarghe na sasàda en facia no?

“Conosèndote te saréssi ancora drìo a corer. Nar che nare”.

No ho miga dìt però che ‘l dì dopo sarìa nà su col dodese a far fora que l’orsa che m’aveva rot le bale no?

“Ma te saréssi stà content se quei de la forestale i l’avés copàda al posto tuo…”

Ma gnanca per sogno osc’ia. Anca se som fiol de cazadòri no m’è mai piasù la càza.

“Però secondo ti, soto soto, dai, te ghe tègni el borom a quei che l’ha copada que l’orsa…”

-Oh, con ti propri no se pol discuter. Te gai el paraòci. Sònte sta mì a portar chi en Trentim i orsi? No, se sa. No gài da ani sto progièto per sti orsi? No hai ciapà anca soldi da l’Europa per nar envanti? Oh, che i se li ciucia sti orsi. Nel bem e nel mal. Che i ghe stàga drio pu bem che i pol, Basta però che qualchedum no ‘l vegna a darme de l’asasìm sol perché abito en Trentim, tut chi. Elo domandar massa?

“E coi lumàzi, le aole, le costolete de cervo … come la metente?”

-Me par che l’ultima volta che te sei vegnù a mè cà t’hai zacà anca tì senza star lì tant a parlar del perché e del percome … o sbaglio? Difati la verdura l’è vanzàda, ma la roba messa sula grigliada l’è sparìda en do minuti. E cossa dovréssele dir quele pìche de uva, schizàe per far el vim che t’hai bevù?

QUEI CHE COPEVA I ORSI STI ANI …