Nesùni se trà pù ‘n politica

di Cornelio Galas

Trent, 2035

-Ehila Giani, ‘sa fàt chi en giro per Trent, la sposa t’àla molà el colarìm?
“Ma valà, tàsi mona, l’è che gavrìa bisogn de parlar dei mé mistéri con quei de la Provincia, ma zò en Busa zamai no se trova qualchedum da narghe al vèrs …”.
-Ma scolta, varda che adès se fa tut col compiuter neh … i è finidi i tempi che se parléva en piaza coi politìzi tirandoghe la giachèta dopo messa cantada.
“Si ma ghe sarà tut mal qualche ufizi dove se pol almem domandar enformazion no?”
-Eh, sta chi l’è na storia longa. Vedo che no t’hai gnancòra capì bem come l’è cambiada la storia da quando te eri en Portogal…
“Va bem, som stà via tanti ani, ma no credo che ghe sia stà po’ sta rivoluziom dai …”
-Envéze caro Giani la ghe stàda la rivoluziom, e gròsa anca.
“No sta dirme che adès gavém de nof el Duce perché no ghe credo …”.
-Pèzo, pèzo del Duce.
“No stà tòrme ‘n giro dài che som zà sule ucie per me cont …”.
-No gh’è el Duce. Ma no gh’è pù gnanca politizi … sparìdi tuti.
“T’ho dit de no tòrme ‘n giro dai, te prego”.
-No te tògo per le bàle. Digo sol che no gh’è pù nesuni, da ani neh, che volò butàrse ‘n politica eco.
“Ma valà, sta chì l’è una dele to solite barzelete. Te saludo che gò da nàr …”.
-Spèta, spèta … dai che bevèm qualcos così te la conto tuta.
(in un bar a Trento)
-Alóra, bom sto Nosiòla ah?
“Sì, dai, el se làssa … dime dai de sta rivoluziom”.
-Quand’elo che t’eri nà en Portogal?
“Subit dopo ciapà la pensióm … osc’ia no me ricordo”.

-Bem, tut mal prima de nar via te te ricorderai bem no che gh’era sta questióm dei vitalizi, dei soldi che ciapèva quei eleti en Provincia no?
“Sì, me ricordo, i seitéva a dir che i gavrìa dàt en tài ma dopo vegnìva fòra semper che qualchedum el nèva nei tribunai e alora i doveva tacar via a far na lège diversa. Sì, na tiritera, en volerìa ma no pòdo, en podrìa ma no vòi, che ensoma …se restéva semper nela stesa situaziom. E entant i soldi ai politizi i seitèva a rivar …”.
-Eco, propri cosìta. Fim quando è finì i soldi, anca a Roma. Fim quando la Merkel la gà mandà ‘l cont anca dele tartine magnàe a so temp dal Berlusconi.
“E alora?”
–E alora la lège giusta i ha dovù farla anca se zamai i bòi i era scmapài dala stàla.
“I gà tirà via i soldi ai politizi?”
-No, ma i gà dat subit na bela regolada.
“Ensoma no è cambià gnent gnanca quela volta dai, cossa me còntit su de rivoluziom …”.
-Spèta. Che no l’è miga finìa chi osc’ia. Tira, buta e mòla, en dì i ha ciamà zò a Roma n’avocato todésch, stàifelo, che a so temp l’aveva sgarì anca quei de la Folksvaghen. Pensa ti che ‘l ghe fèva controlar le marmite una per volta prima de vender le machine … e se gh’era dei difeti quel che avéva fat la magagna el vegnìva mandà en Africa a ‘ndrizàr le banane.

“Elamadòna …”.
-Bem, sto todesch l’è vegnù en Italia, l’ha vardà le carte de quel che metèva via i politizi, l’ha fat do conti e po’ l’ha butà zò sta lègie nova …
“Però el gavrà làssà qualcos lo stess dai … figurarse se ai politizi taliani te ghe tiri via i vitalizi”.
-Eh ma l’è propri questa la gabola. El todesch l’ha fat na tabèla. Tant a l’ora per tuti i politizi e tant de soldi da tirar via per le pensióm.
“Ho capì, no è cambià gnent, dai che gò da nar …”.
-Fermete ‘n moment cramento. Tant a l’ora vol dir tant per ogni ora che te laòri, che te fai qualcos, che te prodùsi. Gh’è denter anca quindese minuti la matina e quindese minuti la sera per nar a torse ‘n cafè, fumarse na cica de fòra, nàr a pisàr. Po’ però, arbaiten …
“Scolta, hat finì de contarme monàe?”
-No l’è monae. Ala fim dele riuniom, ala fim de la giornada i tiréva na riga: tì cossa hat fat ancoi en Parlamento, en consilio provinzàl? Hat risolto qualche problema o set restà lì a dormir, a lezer el giornal, a parlar al telefonìm?
“Va bem, ma per laorar en politica bisogna ogni tant ascoltar anca quel che dis i altri, votar, alzar la mam, dir la tua …”.

-Beh, el todescom l’ha bem mèss denter le so tabele anca ste robe neh … però se ala fim de la fera era vegnù fora che no s’era arivai a combinar gnent … beh alora tuti i ciapéva per quela giornada metà soldi e via nar che nare.
“E i viàzi en treno, en aeroplano … le missióm a l’estero, el magnar e dormir a Roma?”
-Ah i gà dat zò na sfrondada anca a quele spese lì neh. Semper co le so tabele. Set nà a magnar en tratoria lasando en cont lonch come ‘l prà dela fàm? Brào. Adès te t’el paghi caro mio. Perché en mensa drìo la staziom con pochi euri te gavèvi el prim, el secont, en bicer de vim, um de aqua e la domenega anca la torta. Pù ‘l cafè, se sa.
“E le pensiòm?”
-Anca lì le so bele tabele. En pù, ala fim, se vegnìva fòra che te gavévi do pensiom per via del mistér che te fèvi prima de nar en politica te podévi zernìr cossa far: farte dàr endrìo i contributi de la politica (tassài come tuti, se sa). Opura tegnirte la pensiom dela politica e lassàr perder l’altra. O viceversa, come te volèvi ti. Ma no do o tre pensiom enséma neh.
“Sì ma chisà cossa che i ciapéva tut mal de vitalizi…”.
-Eh no, perché el todescóm l’avéva zà capì prima de tuti el tài del prà: io zai che taliani, pizza, mandolino mafia, essere furbi ja…

“En pratica?”
-De fato quei che cambiéva partito, quei che era stà denter mem de n’am, quei condanai anca sol al prim gradìm, no i ciapéva endrìo gnanca i contributi.
“E quei morti? I gavrà dat qualcos ai sói …”.
-A quei morti entant che i era en politica i ghe fèva en bel ricordo sui giornai e ‘n televisiom, magari anca en libro. Po’ en funeral de quei grandi, co ‘l car tirà da oto cavai. En zentenàr de ghirlande. El rosàri col papa. Po’ i ghe mandéva el cont ai sói del mort. Se sti chì i paghéva bom. Se no i tireva via tute le spese dai contributi e ‘l zinquanta per zent del rest, tasà al trenta, mem l’Iva, i ghe lo laséva biòt.
“Diaolporco …come èla nada a finir?”
-L’è nada a finir che, temp tre ani, de candidài a tràrse en politica ghe n’era de mem dei posti zò a Roma, nele provinze, nele regiom, perfim nei comuni mèssi enséma. Pensa che chi a Trent, quando i ha fat le ultime eleziom, i tabelóni de lamiera dove de solit i metéva su i facióni dei politizi da votar, i era squasi vòdi.

“E chi elo alora che mèna el toròm ades?”
-Varda, ala fim, dai e dai, i ha capì che per far nar envanti la robe giuste basta ùm che ‘l gh’en veda fòra co la calcolatrice, um che ‘l stàga atento a come se spende i soldi de tuti, um che se vèi el teremot no ‘l se perda en d’en bicèr de aqua, ensoma…per ogni problema basta che ghe sia qualchedum che fà el so laòr bem, senza robàr, senza prometer robe che no stà nè ‘n zèl nè ‘n tèra. Capì come?
“E alora per le me questiòm da chi vaga chi a Trent?”
-Dipende, tut mal se te ciami sto numer chi, che del rest no te paghi gnent, en do minuti te parli co la zent giusta, anca senza far còe.
“Robe da no creder …”.