LE FRITELE DE POMI

Ocio che se magnè queste, prima, dovè star n’atimim endrio col rest. Ensoma, le empienìs… Ve serve quatro pomi (golden o renète, meio dela Val de Non). Po’ do decilitri e mez de late (gh’avrè qualcos per misurarli, se no fè do bicieri grandi e mez che ve diga), 180 grami de farina bianca, do ovi, zucher, meza bustina de levà vaniglià, rum (o sgnapa), canèla en polver e sal.

Via alora: butè el lat en de n aterina, denter la farina, el ros dei do ovi (el bianch montèlo en banda), do cuciari de zucher, el levà, giust na presa de sal e do cuciari de um (o sgnapa). Laorar bem, mai fermarse, dai che deve vegnir fora ‘na bela pastèla che la staga a um. Quando ve par che la sia pronta (ocio ai fregoloti: schizarli e empastar de nof se i ghè) buteghe su el bianch dei do ovi che avè montà su bem bem (no l’avè fat? Oscia cossa spetè che i ve lo faga altri?). Po’ se fa polsar el tut per na mezoreta. Meio meterghe sora na pezota…sula terina, no che la toca la pastèla.

Entant che la pastèla la polsa voi no podè…polsàr. Perché gh’avè da tirarghe via la scorsa ai pomi. Via el tòrsol( vardè che i vende per poch quei cosi de fer che ghe somiglia a tubi che taia…zac e fè en de n’atimo). E po’ se taia (per el largh) i pomi fasèndo tante fetine tonde spesse mez centimetro Metè zo le fetine nela pastèla en modo che le se nega…ensoma come quando fè le cotolete per capirne.

Padela con oio che el se scalda bem (no che el fuma…) entant sul gas. E quando ve par el moment giust (oio calt neh….ma no che el brusa) buteghe denter le fetine empanae, disente cosita. Quando le se sgionfa e le ciapa en bel color (che no l’è né gris, né scus, né maron…per capirne) tirele su co n’arnes coi busi che l’io el vaga zo bas e meèle su na carta che suga su l’ònt…magari cambièla ogni tant se no l’è del bao. Na spolverardina de canela e una de zucher a vel. Se se le magna ancor tepide…se le magneria tute. Frede comunque le se lassa lo stess …

Mi ghe beveria ensèma vin sant de Toblim (o dele Sarche) o en moscatìn e a ogni modo en vin dolz. No sech …