LAORAR CHI …
di Paola Carlin
… Chi dove? Ma chi, en do che laoro mi da en mùcio de temp …
Ve l’ho dit en mùcio de volte che me pias el me laoro; tanti i podrà stòrzer el nas e domandarme cosa ghe troverò de si bel nel vedèr sofrir la zent. Ma per fortuna no i soffre miga tuti quei che me ven arènt !
Tanti i vèn anca per robe “lizeròte” e alcuni i me fa anca sorider. Tante persone che laora chi con mi no i è tant trentini, disente che i ven da zo en font al stival e no i ghe capis proprio gnent del nos dialèt !
La prima roba che i ha dovèst emparar i foresti che laora chi con mi l’è che tanta zènt trentina la “g’ha le stornìsie”… Tanti i g’ha anca “el brusacor” e sti bravi laoradori i se preoccupa e ghe manca pòc che no i faga scatar l’alarme antiincendio; per fortuna che po’ i capis che no sta brusando gnent.
Alcune persone le ven da noi perché le vorìa “far el kech up”… e le patatine no? Noi ghe spiegan che no l’è el posto giust e che forse saria meio far en salt zo en font a Viale Verona al Mec donald …
Ghe da dir che i trentini i è proprio bravi e educai e quando i vede che le persone che laora chi i è foresti i se sforza de parlar en ‘talian e anca se i ariva tuti spaventadi i ne dis en ‘talian quasi perfetto … “ho paura che mi si strùpia le coronarie”!!!
Sempre en bòn ‘talian en dì uno el n’ha dit che el gaveva “la testa tutta otturata”… e lì no ho avù nesun dubbio e ho ciamà subit i idraulici; ma no i è miga riuscidi gnanca lori a destroparlo sto pòr òm …
D’ogni tant chi par de eser en guerra! Uno l’ha avù “n’attacco de cervicale” e n’altro che el gaveva i calcoi renali (e mi volevo ciamar la professoresa de matematica de me fiol pù piciol che l’ei proprio brava a far i conti) el n’ha dit “ma non mi bombardate?”. Alor aven ciamà l’esercito e i è arivadi en freta con ste tute mimetiche che mi gnanca i vedevo e armadi fin ai denti tipo el Rambo! G’aven spiegà che un l’era sta attaccà dala cervicale e un el voleva eser bombardà ma i n’ha tratadi a male parole e i è nadi via rabiosi … no capìso.
Da noi ven anca zent che la guerra el l’ha fata sl serio … e alcuni i è nostalgici e quando la ghe scampa i ne domanda “en do ela la ritirata?” e una de quele che laora chi con mi l’ha capì che el voleva nar en bagno sol quando el se l’era fata meza adòs.
Po’ se sa che i trentini con tute le luganeghe e el formai bon che i se magna i g’ha tuti el “polistirolo” alt … ma no se ven da noi perché se g’ha tant polistirolo … ghe sarà qualche fabrica che tòl su quel che se g’ha de masa; se pòl anca guadagnarghe qualcos a venderlo, credo.
En dì a un che è vegnù, no me ricordo per che magagna, g’ho dit de sdraiarse sul lettin che doveven visitarlo; e sto chi che l’era proprio na zima el m’ha dit “ ma me meto sdraià da prelievo o da intramuscolo?” Giuro che no savevo che ghera tute ste posizion e adès sto ben atenta a specificar ben come i g’ha da meterse su sto letin (poderia scriver en sanitarkamasutra …)
No ghè sol zime en giro e ogni tant né ven i professoroni che el dialèt no i sa gnanca cosa che l’è ma che i parla proprio studià e difizil; a uno quando gaven domandà per cosa che l’era vignù el n’ha dit … “allora, in virtù del fatto che …” e lì mi m’ero za endormenzada e temo de eserme persa la parte pù bela del discorso …
Gh’en saria de robe da contar sul “laorar chi” ma per entant no me ven en ment altro; de sicur seiterò a parlar en dialèt coi vecioti trentini che i ariva chi stranidi e che i se trova spes davanti persone che le è si competenti e professionali ma che no sa na parola del nos bel dialèt trentin e che spes parla anca en den ‘talian con n’accento strano …
Ades ve saludo perché g’ho da nar “a spander acqua”… o elo sol i masci che dis così ? Bon, alora vago a darghe aria ala “natura”…
A prest.
