LA FELIZITA’

di Cornelio Galas

L’è pu fàzile pèrderla che trovàrla,
perché quando se la gh’à,
no te sai gnanca de avérghela.
En po’ come quando va via la luce,
e de colp te te trovi al stròf,
che te continui a schizàr botòni
e no te sai quando lampadari,
televisiòn, frigo e compiuter
i tornerà de nof a funzionar.
Pol capitar de scambiarla, dele volte
coi soldi, i viàzi, magnàr, béver
bele done che te dìs sol de sì.
Opùra suzède che per zercàrla
te ciàpi sentéri che porta al piàn
dove no serve fadìga per caminàr.
Ma anca se te la trovi per stràa
stà ‘tento, la pol duràr pòch …
Perché no te pòi seràrla ‘n casa,
o tegnìrla sol per ti, soto ciàve:
éla la vol sgolàr libera ne l’aria,
ciapàr el sol, rider co la luna,
e soratùt star ben en compagnia.
Eco, quando quei vizini a ti
i è contenti de vederte, de parlarte,
quando la zènt entorno
la te saluda semper con ‘n sorìs,
eco l’è alora che te poi bem dir
de avèrghela come morosa.
E te vedrai che bel che sarà
quando la deventerà to spósa.
Te gavrài la casa piena de amìzi,
de zènt che sta ben con ti.
E èla? La te sarà semper tacàda
no la te molerà pu.