di Cornelio Galas
Nago, 2034
-Ciao Doro, come vala? Madòna che ‘n pezóm che no se se vede … Ah ma te sei restà gualìf a quando te eri zovem neh… stèssi cavèi, bianchi, ma longhi istéss … dai conteme qualcos… come vala chi en Busa?
“Tàsi, valà, che gò ancora da rimeterme dala stremìa che ho ciapà a so temp …”
-Eh osc’ia, n’om grant e gross come ti … che no gà mai avù paura de nesùm…
“Scòlta, dìme pitòst, da quanti ani èlo che no te pàssi da Torbole”
-Eh dài, me digo almem na desina de ani. Disènte da quando ero vegnù de volta da l’Australia per el funeràl de me mama.
“E dopo?”
-Dopo te sai bem no che som nà a abitar a Milam. E giust ieri som vegnù su chi da ste bande per veder de comprarme na casota dove star en pàze. Magari vizim al lach … Ma, scolta, ‘sa fat chi a Nach embusà ‘n d’en bar? Propri ti che te nevi semper en barca o a caminar en spiagia col to cagnòt … ah, gh’elo ancora el Làchi?
“No l’è mort el cagnòt … ghe som restà sì mal che dopo no ho volù pu cagni. Te te afezioni massa, te vei el magom quando i sta mal e bisogna farghe na puntura per farli morir senza sofrir massa…”.
-Va bem, ma e la barca?
“Eh, quela, l’è na storia longa …”.
-Dai che bevém en sprìz che te me la conti se te gài voia neh …
“Se no te vòi alter …”.
-Dai, animo osc’ia, cossa è suzés po’ de così gròs?
“Te gh’eri bèm chì no quando el sìndech de Nach e Torbole l’era el Rigoti, l’Otorino no?”
-Come no …
“E dopo, quando gh’è stà el Parolari, el Bertolini, el Civetini …”
-Sì, mi som nà via propri quando gh’era el Bertolini me sa.
“Bem, te te ricorderài che tra le tante questiom che no se gh’envegnìva fora en sto benedeto comum gh’era anca quela de l’ex Colonia arènt al lach no?”
-Ma sì che me ricordo. No i fèva che parlar de sta storia a ogni eleziom. Po’ restéva tut come l’era. Perché, l’hai butàda zo ale tante?
“Magari i l’avèssa butàda zo”.
-Eh, osc’ia, ‘sai fat de pezo de quel che l’era de suo?
“Te sài che gh’era ogni dì en progèto divers no? Fèm questo, fèm que l’alter, no forsi l’è meio far n’altra roba…”
-Sì, i ho lezù ani fa che era vegnù anca quel semper encazà en televisiòm, come se ciàmelo, el Sgorbi … no Sgarbi, Sgarbi, a veder se sta vecia colonia la podeva narghe bem per el so museo. Ma me par che ala fim l’abia dit – almem così ho lezù – che …che la féva propri cagar no?
“Eco, eco … ma dopo ha scominzià a girarghe entorno anca altri enteresài a farghe denter robe che no stéva nè ‘n zèl nè ‘n tera”.
-Meio gnent che qualcos de brut no?
“Eh, sarìa stà meio propri che la fussa finida cosita. Enveze …”.
-Enveze?
“Envéze caro Giàcom, è nà tut a petào”.
-Cónteme tut …
“Varda, te la fago corta, se no finìm stanòt. El comum, dai e dai, l’ha capì che sta colonia l’era deventàda zamai en debit.Pensa ti che anca el cuèrt en ram, quel che i aveva fat nòf a so temp, el scominziéva a crepàrse nele zónte. Ensoma, ghe pioveva denter, capì come?”
-Che pecà …
“Fim che i ha ciapà el sach en zima. E dopo tante ciacere e articoi sui giornai i ha dit: basta, la vendém”.
-E qualcheduni l’ha compràda?
“Te sai bem no che i pù furbi no i mète la còa fora prima del temp … I ha spetà en par de aste, fim che squasi co na pipa de tabach la colonia te podévi comprartela sul còmot”.
-Sì, ma chi elo sti furbi?
“Te dirò la verita, su le prime, paréva che fussa stà, tut mal, anca en bòm afare per el Comum. Perché l’oferta l’aveva fàta na società de Pavia. E te sài bem no che la colonia na volta la se ciaméva Preventorio Pavese perché la féva dele cure per i bòci de Pavia no?”
-Sì. sì me ricordo.
“Eco, paréva ensoma che la Colonia la fussa tornàda a far la Colonia. Se no alter ghe sarìa sta’ en po’ de vita, de boci, po’ el lach vizim … magari i avrìa ritacà via a far concerti nel parch de denter”.
-E no l’è finìa così?
“No, perché na volta firmà el contrat è saltà fòra che sta dita de Pavia no la gh’enzoléva gnanca le scarpe a quela vecia del Preventori. L’era e l’è ancora na dita che fa … fa Pavesini. Sì, t’hai capì bem, i pavesini, i biscòti osc’ia”.
-Ma dai, no ghe credo …
“E alora và zò a veder se no te me credi. Nela Colonia gh’è tuti i ufizi, anca quei de la spediziom. Po’ do capanoni che se tàca ala vecia sede del circolo surf, dove i fà sti biscoti. E sula spiagia i fàt na getàda e tirà su sabia e gèra per far vegnir le betoline che porta i scatoloni coi biscoti fati fim a Desenzàm … tèi, i sparmia sui trasporti e no i se trova blocài tra la Busa e Lopi … perché se i spèta ancora la galeria promèsa mèz secol e de pù fa….”.
-Ma te poderài bem far do passi sula spiagia e nar en barca lo stess no? Le è publiche, de tuti, quele robe lì…
“Sì, per quel te pòdi nar zo, nesuni te dìs gnent. Ma nel lach te devi star atento a ste betoline che và e vèi … che anca i batèi i gà ‘l so da fàr a girarghe ala larga. E ‘n spiagia … te sentìsi che spùza de biscòti … robe da no creder, te vèi squasi da gomitàr”.
–
