HO DESMENTEGÀ LA PASUORT
di Cornelio Galas
No sò voi ma mi, quando el compiuter el me domanda la pasuòrt, el pù dele volte resto lì ‘mpapinà, come quando no me ricordevo pù le tabeline a scòla. El fàto l’è che nar denter a brigàr nel compiuter adés ghe se vòl almém na desìna de ste pasuòrt. Quela per fèsbuch, quela per lèzer el giornal, quèla per iutùb, quela per nomericordopù.
Diré: pù bel che tegnìr semper quela per tut? Eh no, cari, zà prova. Vago denter con quela de fèsbuch e me vèi fòra scrit: “Varda che sta pasuòrt el l’ha gà zamai anca n’alter, cambiela demò valà”.
E alora te fai finta (anca se l’è vera) d’aver desmentegà la pasuòrt. E lori i te manda, nela pòsta senza postìm. quela che no gà bisogn de francobòi per fortuna, n’altra racomandazióm: “Tèi, te ricordit l’ultima pasuòrt che t’hai dropà?”. Ma zio càn da l’ùa, se me ricordévo l’ultima pasuòrt miga sarìa nele stràze come adès no?
Tut mal te cambi pasuòrt ma adès no va pu bem l’userném, che sarìa el nome che te te meti sul compiuter. Osc’ia, mì cornelio galas som. Semper quel. No, no va bèm co la pasuòrt nòva diaolporco. E alora prima de spacar su tut ciàmo semper el bocia. Me sento dar, ancora na volta, del “vecio bacuco che no se ricorda mai de scriver le pasuòrt da qualche banda”. E dopo ‘n po’ de smanetamenti el me rimete a posto tut. Com’àlo fat? De solit fago finta d’aver capì. Almem fim ala prosima volta …
Del rest ho provà mì a scriver da qualche banda tute ste pasuòrt. Sol che dopo, el pù dele volte, scancelevo dal compiuter quela cartèla con su scrit “psw”. Perché no me ricordévo che lì denter gh’era le pasuòrt. Pensevo fussa n’eror a scriver.
Fermi lì. Sò cosa avrésse fat voi al me posto. En bel quadernet, e tute ste pasuòrt scrite co la pena biro, sule paginòte a quadreti che così le vei tute a ùm … una dopo l’altra. Ho provà a far anca ‘sta roba chi. No me crederé … diaolporco el terz dì no trovo pù sto quadernet. Vardo dapertut, me vèi anca el nervoso osc’ia. Po’ el dùbi.
Ghe domando ala sposa: àt vist per caso en quadernet pìcol? Me paréva d’averlo lassà sora el calorifero en cosìna. E la sposa: “Ma parlit de quel giòm de carta che gavéva en boca el cagnòt? No, perché l’ho butà via. El gavéva anca pisà sora. Te poi enmaginar se no l’ho butà nela sporcaria …”
