di Cornelio Galas
Dele vòlte, fórsi, no ne rendém conto. O, disénte, ne fà còmot far finta de gnènt. Pensém semper de esser i pù fighi, lezùi, studiài. E anca se i è nài su la Luna, seiém a creder che al de là de ‘l Dòss de Trent, per tegnìrne stréti, senza far tanti salti mortài, no ghe sia nesùni come noi.
En pratica – per tegnìrne larghi stavolta – vardém la luna, le stéle (no le stèle de legn vizìm al caminét neh) e disém tra de noi: “Cossa vòt che ghe sia lasù nel zél: sgrébeni, tera brusàda, gas che te stòfega, maròche sùte, en vent che te porta via … pù bém che chì da noi valà …”.
Adès è vegnù fòra che i ha vìst – con binòcoi grandi come ‘n condomìni – sète pianeti che i podrìa eser come la Tera. Eh osc’ia … com’èla ‘sta storia? Piàm co le mam, calma e gèss: par che ghe sia anca aqua su ‘ste robe tonde che gira da n’altra banda e che se scalda co n’altro tipo de sol (panèi solari anca lì?).
El fato l’è che i è lontanòti: pù o mém trentanove ani luce. Cossa vol dir 39 ani luce? En pratica – se ho bèm capì a so temp a scòla – vol dir che tì te gài en màm n’interutór de la corente. La lampadina (la funziona senza fili, col blùtut se no costerìa massa i cavi, capì come?) l’è su ‘sti sete pianeti ‘pena visti nel binòcol. Eco: schìza el botóm. Fàt? Osc’ia, schìza n’altra volta valà … n’altra ancora.
No s’empìza gnènte? Domam te vai da quel che t’ha vendù l’interutór e te te fai dar de volta i soldi? No, stà calmo. La lampadina su quei pianeti la s’empìzerà tra 39 ani … sì, tant la ghe méte. Entànt va pur a farte en bianco al bar valà. Tòtela con comot. Me sa che te fai a ora a deventar anca bisnòno se te duri altri 39 ani … pecà che magari te gavrài l’Alzaimer a quel temp e … no te te ricorderai gnanca pù de quando te avevi schizà ‘l botóm.
Però no l’è quest ‘l concièto, no l’è questa só màre … disévo, a noi ne par de esser – sia pur en miliardi – i unizi che pòl permeterse de viver su sta tèra. Tanti i vive per modo de viver. Pochi i vive benóm, anca per cont de quei che no ghe la fà pù.
E ‘nvéze, da chi a 39 ani de luce, podrìa esserghe altra zent che ne varda col binòcol. En po’ come fèm noi, dele volte, co le formìghe … “Vàra vàra che corer, che préssa che le gà a portàr via le migole de pàm … le me fà anca pecà te dirò”. E su nel zél gh’è altri che dìs de noi l’istéssa roba … dele volte ah?
