AH, DIGO BEN …

La se finirà, prima o dopo,

sta strussiàda de viver,

no la pò nar envànti così,

sentài col cul su na bomba

che no te sai, no te sai …

quando che la sc’ioperà.

Ah digo ben, no pol finir tut

quando i te mete zó.

Quando i bisatèi i te magna

se prima no i t’ha brusà.

Ma anca te fùssi sol zéndro …

da qualche banda te sarai,

se l’è véra che ‘l spìrit

no l’ gh’è sol nela sgnàpa.

No so, no savrìa che dirte,

su quel che suzéde dopo.

Magari i gà propri reson

quei che dìs che po’ te torni,

sì, te torni su sta tèra,

come ‘n rugànt, en cavriòl,

‘n lumàz opura na volp …

o come n’altro de quei bòci

che naserà dopo de ti.

Se envéze se va su en zél,

me vèi squasi en dùbi …

no l’è che su ‘n quel posto

con tuti quei che è mort

e no sol ‘n sti ultimi ani,

vèi fora un come San Pero

barba longa e facia da ciapà,

che vardando el so quadernòt,

zà pién de ghirigori,

el te dìs, de brut, senza scherzar,

che no gh’è pu posto, oscia

e po’, no t’avévi gnanca prenotà …