di Cornelio Galas
No se gh’en pòl pù ancòi de la solita solfa: “l’è mezdì, ma sarìa de fato l’una dopodisnar… l’è le quatro e mèza ma sarìa le zinque e mèza…l’è le òto ma sarìa le nove de sera… metènte su zena o che fente, spetèm che i cambia de nof l’ora?”. Te sei come semper for de fàse no, come se te fùssi endrìo a nar envanti…ma te resti tut mal endrìo.
Che po’ t’avevi desmentegà de cambiar l’ora ala sveglia. E alora te vegnìva squasi de nar for dal let semper ale oto… che però sarìa le sète. E quando t’hai capì el nof tài del prà… te te sei voltà da l’altra banda (come semper) e è arivà le dése (ne l’ora vècia, giusta, anca se sarìa le nove). Ensoma, no cambia gnent. Te vèi fàm ala stessa ora de prima, te vei som ala stessa ora de prima, te vei voia de moverte far qualcos de domenega matina come prima: mai gnent diaolporco.
Eco, te te scorzi che è cambià qualcos vardando for dala finestra: cramento, zà scur ale sei? (che sarìa le sète)… e po’ ala televisiom no finìs pu le seghe dela domenega dopodisnar. Per fartela corta: te devi ciuciarte le do Parodi n’ora en pu. E za prima, co n’ora en mem l’era asà. Qualcos che sia cambià en meio? No savrìa… ah, forsi el fato che, esendo n’ora endrìo rispet a prima, te par de sentirte pù zovem.
Nel senso che n’ora en mem al dì vol dir sete ore en mem ala stimana, trenta ore en mem al mes, trezentosesantazinque (elo bisesto st’am? e quel che vèi?) ore en mem en de n’am a partir da ancòi. Ciàmeghe poch. Cossa èl che te disi? Che en font i te tira via le ore che i t’ha dat en pù sta primavera? Alora scolta el me ragionamento, osc’ia. Come ghe ciàmei al modo de contar le ore fim sabo pasà? Ora legale no.
Bem, a me cà legale vol dir che l’è a posto co la lègie. Cioè nesùni che ‘n vanza vers de ti, nesuni che pòl meterte en presóm. E a sto nof modo de contar le ore? Ora solare? Ciaméntela col so nome: ora illegale. Cioè miga tant a posto. E se no l’è legale qualcos l’avrà tutmal fat de mal. Difati gò mal de testa, fam prima de la solita ora, som prima che i faga Caroselo, e som anca en tantim zidiòs. Ghe sarà el so motivo no?
El so, el so: diré che som esagerà a dir che st’ora l’è delinquente. Envéze gò le prove de quel che digo. En televisiom i ha dit che finora cambiando ogni tant le ore s’è sparmià no so quanti miliardi de soldi su le boléte dela luce. Su le boléte de chìe volerìa saver che a mi le me ariva semper pu care?
