EL SAOR DELA POESIA
Ancoi l’è zà ieri
e ieri l’era zamài
l’altro dì
El se scòrta
el se slònga
st’orolòi che no se vede
con lanciète
senza baterìe
El te ciava, però
semper sul pu bel
Te scomìnzi a morir
e forse no te ‘l sai
fin da quando i te nìna
e te te pìssi adòs
Varda l’acqua
che core vers el lach
tante goze, ensèma
che magari no se conòs
Scusa tant, te me dìsi
som ciapà, devo nar
E no te vedi
che come i sfrisi
tut entorno
ghè da sbianchezàr
Nem entant
pu o men alegri
dove sto nar
el ne deve portar
Ciapèm per bone
regole, legi
e qualcos che
ne tegna a ùm
Anca quel
che ne dis i preti
prima de far
la comuniom
Nem, si nem envanti
che de drìo
savèm cosa ghè stà
Nem, si nem a l’orba
su tut, propri tut
quel che sarà
“Stè tranquili
che dopo morti
ghe sarà giustizia vera,
quei che ha fat
del mal su sta tera
no i gavrà
premi e regai”
Oh, Siore Dio
se te lèzi ste robe
No sta fàrghe caso
sem tuti su le rode
E sbalotài de chi
e anca de là
en colp te vedi bel
en colp te fai pecà
E po’ cossa m’en fago
Del temp liber
Se propri quel
L’è el me parom?
