QUEI CHE NO GH’E’ PU

di CORNELIO GALAS

Oh, algièri, i era chi, con noi,

adès? El sàt ti ‘n do che i è?

I è nai via, via … dove no se sa.

Ma zèrto  che i era vivi, come noi,

no, no i era come fantasmi …

Ghe parlèven ensèma, i saludèven,

se fèva ridùe, pianzùe … oscia sì:

se beghèva dele volte con lòri.

E adès, de colp, no i gh’è pù,

no i gh’è pù, tèi, no i gh’è pù.

Se va ai primi de novémber

Tuti ensema a vardàr quele foto

Tacàde sul marmo, soto na crós.

E te vèi ‘l magón, sol a pensàr

che ‘n dì o l’alter, su quele làstre

de sicùr te finirài anca ti.

I è soto tera, magnài dai bissòi

O dénter na scatoléta …

Zéndro che zamài deventa créda

con tuta quela umidità.

Te dévi far i conti da per ti

Per saver quanti ani i gavéva

quando i è nai via da chì.

Na sotraziòn tra l’an en banda

e quel scrìt envéze a zanca.

Fàzile con i pòpi, demén

con quei morti da vèci.

Ogni volta che sofio sule candelìne

dela torta per el me compleàn,

me vèi i sgrìsoi sol a pensarghe su:

la fòrbes la se avérze semper de pu

pronta a taiàr, co ‘n colpo séch

tut quel che gh’è tra le prime pianzùe

e le lagrime de quei che m’ha conossù.

Ma no bisogn farse ciapàr da la fifa

e gnanca da quela ròba da maghi

che suzéde entant che te dormi.

Pitòst molàrse fòra, rider e far rider,

darghe ai soldi el valór che i gà,

ma savér anca che con tì, nela bara

sarà difìzil che i te servirà.

E far endigestión de amor, de còcole

negàrse nei oci de na dona,

levàrse, ensognài, per veder come

el sòl el se tira su da drio i monti.

L’è sol così che la mort la se sfànta

tanto che quando la dovés arivàr

no te gavrài temp per saludarla …