TRENTINI A L’INFERNO – 4

TRENTINI A L’INFERNO

“L’è tut na comèdia”

di Cornelio Galas

Quarta contàda: Giovanni Battista Holnaider de Gardena

M’era zamài squasi desmentegà
d’esser lì, tra tanti danài
quando en ciàs, come de fèri
el m’ha sveià come dei sonài.

E eco che vedo quel pòr laór
ligà co le cadéne su n’asesèla:
de sóra a lù, ‘n grant orolòi
e le lanzéte co la so rodèla.

Quando se arìva a na zèrta ora
s’averze en sàch pim de monéa
e tut vèi zo, dala testa ai péi
sora quel’óm come fussa préa.

Gnanca ‘l temp de nàrghe vizìm
che quel danà, ciapàndo ‘l fià
el conta tuta la so bruta storia
e perché l’è lì squasi empicà.

“Mi som Giani Batista Holnaider
nat en Gardena e vivést en Fiéme
ero n’artista de quei propri bravi
tante e bele robe, fate tute enséme.

Savévo laoràr e anca bèm el fér,
dal grànt al pìcol, ‘n po’ de tut
fèvo pompe e encisióm sui fusìli
ma anca de orolòi no ero sul sùt.

E no l’è finìa chi: drìo ai òri,
me piaséva sbisegàr, far sculture,
laoréti col legn, anca ‘l muradór
per no parlar po’ de le mé piture.

Ero brào anca a sonàr e nar a càza
quanti orsi, lévri, cauròi ho copà
e anca pescar, sonar tant me néva
a pascolar le vache perfìm som nà.

No gh’era mistér che me spaventésa
gnanca la guera se propri la gh’era
ma no l’è stà quel che m’ha ciavà
‘n tradiment el m’ha butà en tèra.

Ero riusì, dopo aver tant strusià
a far monéde, come vere, d’arzènt
Ah le era bèle, te restévi encantà
e l’è per quel che le tegnìvo arènt.

Sol che na sera, qualche ‘nvidiós
vist quel tesoro, sol bel da vardar
l’è nà de corsa da quei che comanda
a dirghe che mi, si che ero ‘n falsàr.

I m’è piombài poch dopo en botéga
e i m’ha més tòchi de fer ale mam
La not l’ho pasàda tuta en presóm
“Te vedrài, i te mòla forsi domàm”.

Ma i dì i paséva, um dopo l’alter
e mi ero lì, en sórz en taiòla
Nesuni che i m’abia mai po’ dit
perché ero tratà come en taiagola.

Gnent i ha lasà de quel che ho fat
for da presóm en miseria som restà,
e quando i paesani i me vedéva …
“Varda che fìm ha fat quel becà”.

E ades som chi, soto st’orolòi …
ogni ora che pàsa vei zo le monéde
le me spaca la testa, e che mal
quando quel sach ala fim ‘l zéde.

Fème ‘n piazér, voi me paré bòni
quando torné de nòf ‘n Gardena
diséghe a quei che fa i artisti
de ricordar ogni tant la me pena.

Sì,ho pagà e sto pagando ancora
na colpa che a mi mai m’ha macià
e quei laoréti fàti col cesèl
che no i li perda, sarìa en pecà”.

Sentì ste parole, dite con pasióm
no m’è restà che farghe segn de sì
e con San Romèdi, tut en confusióm
som nà envanti: “No, basta star chì”.

Questa voce è stata pubblicata in Senza categoria. Contrassegna il permalink.

Lascia un commento