Testament

di Cornelio Galas

De solit l’è meio farlo prima che dopo. Anca perché dopo, diaolporco, no te pòi firmarlo e alora no ‘l val gnent, diséntela tuta. Farlo prima ‘l te fà pensar che te podréssi morir magari el dì dopo. O l’istessa sera. Te vèi ensóma da tocàrte lì giust perché de solit se fa così quando te vei quela che i ghe ciàma la pìpa al cul. E alora féntelo dai ‘sto testament. Entànt, el digo subit, no l’è che penso de lassàr tant a quei che resterà. Parlo de soldi, case, robe en banca che pol frutàr. Bòm. Parlém del rest.

Gò via dei libri, dele robe scrite, dei documenti, dei fàils nel compiuter che forsi podrìa enteressarghe a qualcheduni. Oh, tolèli fòra dal me Pc (spero che la sposa la sia de luna bona) e fé quel che volé. No gh’è gnent da pagar. tut agratis. Altre robe da dir prima de esser mes de soto? Massì: se fussa lì che pìolo, pu de là che de qua. scominzié a vardar quel che podrìa tornar comot a qualcheduni. Lassè perder, v’el digo subit, el fegato: massa biciéri. Lassè perder anca i polmoni: massa zigareti.

El rest però el podrìa nar bem. Osc’ia… sul pancreas no giuro. Sul còr… ma sì dai. Passénte al rest, al funeral, a l’òbit dai. El so: se te disi gnente fiori ma opere di bene te deventi subit quel che la gà su con quei che fa le corone. Se te disi nei necrologi che bisogneria far oferte ala lega contro i tumori, tuti che i dis: el savevo che el gaveva en cancro por cristo.

Se te fai la messa de funeral a Arco, enveze che a Vignole, eco che i dis: no l’è mai stà dei nossi. Se te te fai cremar: ma dime ti, pu bel che esser mes de soto co la so bara… Cossa volé che ve diga: dopo che no ghe sarò pu fé quel che volé. No sté pianzer demò. Vedrìa enveze na gran festa. Biraze, vim per tuti, rugantàe da magnar. Per dir, tra ‘n rut e l’alter: Cornelio, um en mem stasera che beve e zàca.