TASTEL E GRATEL

Gh’era na volta, prima che vegnir fora che la ciocolata la fa engrassàr, do matelòti che s’era pèrs ‘n d’en bosch, dale bànde de Bedolsvèlto, sòra el lach de Pincheghèra (adès se ciama Pin no ‘l gh’è).  Tàstel e Gràtel, se ciamèva sti do boci pìcioi, scampài ai sòi, na dominica dopodisnàr.

E zamài era vegnù sera. Sàmper pu stròf en quela sèlva. Tra pèzi alti, ninzolèri sèchi, fonghi màti e zigàr de bestie stràne. Stormenìdi e stremenìì, Tàstel e Gratèl no i savèva pu che far, ‘n do nar. Po’ de colp, com’ela e come no ela, i s’era trovai davanti na casòta. Scominzièva a fàr frèt e tirèva anche en pèl de vent.

“Dai che nèm dènter – dìs el Tàstel, el pu vecio dei dòi – ne scaldèn demò i òssi, te verài che i ne troverà”. Gràtel, la putelòta, la stèva su le sue. Ghe parèva, squasi, de far en pecà. L’era na casa dei altri, e no se roba, no se spaca – ghe diseva semper la mama – le robe de quei che no se sa. Tut mal fam, son e frèt ala fin le ha fat en modo che anca la pòpa la se convinzès.

E alora dènter tuti doi ‘n sta casòta. Scura fora ma anca dapertùt. E ‘n profumo … de … de … “Ma ‘sta chì – dìs el Tàstel – metendo el nàs su ‘n taolòn … stà chì la parerìa ciocolata”. E en quel mènter el spàca ‘l bràz de na carèga. E ‘l sa en gròss bocòn. “Sènti Gràtel, senti che bona, pu de quela de … pu de quel che l’è pu bon”. Zò alora a rosegàr. En toch de chi. En toch de là. I gh’aveva le boche piene. I era zamai squasi engosài. “Toh, magna questa che mi entant tàsto la scala”.

A Bedolsvèlto entant i era tuti desperài. “’n do sarài, ‘n do sarài nai … Dio mio che tragedia, dai fè prest che i mòre engiazài”. Zent de chi, zent de là. Co le pile e i prosàchi. Forestài e carabinieri, omeni e done, tuti ciapài. “Ti dal sentèr verse l lacghèt de le rane, ti vers la val e ti spetène qua”.

Nela casòta i boci i era demò tèsi, squasi drio a endromenzarse. Quando de colp, s’averze l’ùs e se sente come el pàss de zàte larghe. “Tàstel – dis la putelota – gh’ò tanta fifa. E me la son anca fàta adòs… “. No se sente altèr nel stròf. Po’ vei fora sto orsàt, poch pu grant de ‘n matelòt. “Cossa fè ne la me baita”, el dìs co na voze gn’ancora da bestia granda. “M’avè magnà tuta la cosina … speta mi che ve la fago pagar”. Tàstel, che l’èra zà l’òmet de casa, el fa finta de esser gròss: “Tèi, chi set a parlàr cosìta … torna nel bosch che no pol esser questa la to tana. L’è nel bosch, che le bestie come ti, le deve star, dormir e magnar. Dai va via, làssene polsar.

Alòr l’orsàt el s’è mes a piànzer. Come se i l’avès sgarrì. “Mi no voi far mal a nesùni. Dès ve conto perché son chi. Zà e temp ero con me fradelòt e me mama, l’orsa Daniza. Nèven en giro per sti boschi semper contenti e sdravacai. Sghiramèle, tete da ciuciàr, zòghi e le af da spaventar quel temp che basta per robarghe el mèl. Me mama no l’è de sti posti. La vegniria a esser na slovena.  I l’ha portàda chi da lontan. Sol che l’era spaesada. Sì, l’è vera, l’ha fat anche qualche dàn. En brut dì i è arivài coi sciòpi. Un el gh’a anca tirà. La parèva endromenzàda. Ma i oci no l’ha pu avèrt. Via, strozzègandola i l’ha portada. E da alora no se sa pu gnent. Mi e me fradèl, ne sen persi propri come voialtri. Fin che son restà mi sol. Fret, fàm sarìa bel e che mort se no avès trovà sti do muri de scondon.

Dènter gh’era na vecia, bruta e cativa. La m’ha serà en de na gabia. E la m’ha dat tant da magnar. “Quando te sarài en po’ pu gròss – la disèva stizando soto ‘n parolòn – te magno en umido, cola polenta de formenton”.  E lì, nel paròl, sarìa finì, se ‘n dì no gh’aves avù fortuna. La vecia, cascando endrè, l’è finìa sul foch e l’ha slusegà, come la luna. Buta e mola, son vegnù for dala gabia e da alora me rangio co ‘sta ciocolata. En tochet a la volta per no spacar tut. Fin che la dura chi son anca al sut”.

I boci, a boca averta, no i riussìva gnanca a dir baf. Lontan se sentiva gosàr i socoridori. I era vizini zamai, prest  l’aiuto el saria arivà.

“Ve prego popi, no stè dir gnent, né, né ….tornè a vossa cà”. Tàstel e Gràtel, co le lagrime sui oci e ‘l mocìn sul nàs, i è scapài de corsa.

“Ma ‘n dove volève nàr che n’è mess tuti en agitaziòn … stasera gnent da zena e subit a paion”. I boci i ha ciapà le cuerte che quei gh’aveva portà. Po’ pian pian i vegnùi zo, dale bande dequel che adès se ciama  Bedolpian. No i ha mai dit de l’orsat. Pu che alter per no ciaparle. Ma anca perché quela bestia ogni tant. nei sogni dela not, la i fa ancora pianzer.