SAORI – I strangolapreti

Se l’è ‘n pèz che no né ‘n ciesa no i resterà sul gòz. Scherzo, se sa. Anca perché par che el nome no ‘l sia da zercàr ‘n storie de preti finìe mal per averli magnài. Se né su uichipedia e trovè perché forse i se ciama così. Entant preparève en chilo de pan vecio, mez chilo de spinàzi, do òvi, mez litro de lat, oio semper del nòs, cioè dela Republica de Vignole (va bem anca quel de ‘l Garda Alt o del Sarca Bas), farina bianca, na nos moscata, foie de salvia, sal, pever e zigola. E formai gratà. No dovrèsse spender tant.

Alora tachènte via? No, perché se no me i fago per me cont e ciavève neh. Anca perché dovè scominziàr prest se volè zacarli a mezdì o a zèna. Entant el pam vecio, taià su prima a dadèti,  el và mès en moia per tre ore (ve l’avevo giust dit de ciaparve per temp) nel lat pena pena tèpit. Entant en banda ciapè i spinazi taiadi zo fini (ma de soliti se tòl quei surgelai e fè pu prest…) e i fè saltàr (no massa, che se no i vei fora) en de na padèla con poca acqua e buro. Denter sal, pever e nos moscata.

Finì le tre ore del pam vecio en moia nel làt butèghe denter la padela coi spinazi. Cioè i spinazi che avè preparà nela padela, se sa. E denter anca na zigola taiada fina fina e rosolada prima ne l’oio. Denter anca na spolverada de formai gratà (grana trentin sarìa meio), i do ovi (butè via i gùssi da bravi, devo dirve propri tut?), sal e ‘n po’ de farina. Via adès a misciàr col  mestol de legn. Via, ancora…deve vegnìr fora na specie de pasta verda che no la se sfanta. Fè ‘n po’ polsar, spetè che se suga su tut. N’altra spolveradina de farina se serve perché no veia fora na broda verda (che no la va bem…).

Sula fornela, sul gas, ensoma sul foch entant avrè zà fat boir na padela de acqua salada (no ocor nar al mare per torla, basta meterghe en pugnetin de sal gros). L’acqua fala le bole? Bem. Prima de butarghe denter quei che deventerà strangolapreti dovrè però prepararli ‘sti gnochi che strangola i preti. Ciapè la “pasta verda” che è vegnù fora e scominziè a far quel che volè. I volè come i canederli? Fei come i canederli (alora va bem meterghe denter anca en tock de speck o ragù de carne se propri…)I volè come i gnochi? Fei come i gnochi. I volè bislonghi? Fei bislonghi. Quel che conta l’è che no i sìa massa grossi perché alora dopo ve strangolè sul serio quando i magnerè. Denter alora sti “tochi” come i avè fati co le vosse manote.

Quando i vei su a gala i “peschè” (no ocor la cana e gnanca la rè, basta en mestolim). Metèi su ‘n piatòm o en vari piati: quei de quei che li magna. Come volè. Sòra ‘n po’de sughèt de buro che avrè fat vanzar (ah no ve l’avevo dit? Beh ricordevel…) ‘n’altra spolveradina de grana e ‘n par de foiète de salvia che faga faziòn. Mi dirìa che con ‘n bon bicier de sciàva va zò tut che ‘l se copa…