SAORI, I “MACAGNANI”

Avè comprà en par de filoni de pam en pù perchè doveva vegnir i suoceri, i amizi, quei che dopo ve l’ha dàta sbusa? Nessun problema. Se fà i macagnani. L’è na riceta dela val de Fieme. Dove i filoni i se ciama “Bèchi panzalini” o “sdramèi” o “sdramelòti”. Po’ gh’è anca – che ghe somilia – la “bìna” o el “gramolaa” o ancora el “pan taià”. Ma ‘ntant nente coi filoni. Quei longhi, se capìs.
Fènte per sei che magna? Alora ve serve:
– En filòn gròs vanzà, quindi zamai sech
– Marmelada de mirtilo (de granzòni per capirne)
– mez liter de late
– n’eto de farina bianca
– do ovi
– en cuciar de zucher
– zucher a velo (de quel vanzà dale colombe de Pasqua, ma anca dai pandori de Nadal va ben … se el gh’è ancora)
– en bicierin de sgnapa
– en pel de bicarbonà de calcio

Quant ve narà via per farli sti macagnani? Tre quarti d’ora se tut va ben.

Scominziente? No, perché se no gavè l’estro giust l’è meio nar en pasticeria e comprarse qualche pastina. Ma entant el filon vecio el resta lì tut mal … e butarlo via saria propri en pecà. Via alora a taiàr sto filòn. Taièlo su come se taièsse en salàm. Fete de do centimetri de spessòr. Po’ bagnè ste fete sol da na banda nel late. No meterle zò tute. Sol da ‘n tochèt. Su l’altra metà dele fete, quele che no avè bagnà col late, ghe metè enveze en strato de marmelada de granzòni. E adès le tachè ensema da le bande bagnad de late e da quele co la marmelada. E adès tut zo ne la pastèla. Quala pastèla? Ve spiego come farla (entant lassè star le fete che le se taca meio). Sbatè – per la pastèla – farina, ovi (senza gussi), zucher e la sgnapa (se no l’avè bevua sora penser) e anca el bicarbonà. Sbater, sbater, sbater ben. Come se fusse deventai la centrifuga de na lavatrice. O ‘n guindol per filar la lana…
Eco adès denter nela pastela le fete tacàde. E po’ subit nela padela con oio de oliva (extra vergine del Garda quel pu meio) che squasi el fuma. Quando le fete le par de oro. Fora da la padela. Subit su na carta che asorbe l’oio. Sora el zucher a velo. E denter nei piati sti macagnani. Pronti per eser zacadi.
Cossa beverghe drio? En moscatèl, no gh’è dubi.