“Salve Regina”
di Cornelio Galas
Gh’è ‘n capitèl, a metà dela stràa per Vél,
che fim da bòcia ‘l m’ha semper ciapà…
perché arivài lì, vegnendo da Bolignàm,
te vèi da dir: “Zamài sèm vizini ai Ròchi”.
Quando per tèra gh’era ancora quel gerìm,
e ‘l sfàlto i lo sparmiéva come fussa oro,
l’era lì, a “Salve Regina” che se se ferméva,
per zontàr l’aqua nel radiator dela machina.
Me nòna ‘ntànt, la sbiseghéva col so rosàri:
“Salve Regina, màre de misericordia…”
na preghiera che conosévo bèm, anca mi,
quante n’avevo dovù dir dopo confesióm.
Pò su de nof: “Pòpi, a posto col pisar?”
e piam piam la Giardinéta la néva si su…
Fim quando se vedéva i làresi, i pézi,
e denór anca qualche bus ros de fragola.
Gh’era i granzóni, le ampómole, i fonghi,
qualche schiràt che magnéva le nosèle,
per aria osèi ‘namorài tuti dor da màt…
e noi co le caròbole en boca da momolàr.
Arivai a Sant’Antòni, zo prima le caréghe,
do sàssi, el fòch ‘n mèz, e sora ‘l spiedo,
“Làssa che ‘l fàga le so còmode brase…
che la fiama l’è alta ‘l polo ‘l brusa subit”.
Do peàe al balóm, n’arco fat na cordesèla,
“Se fè i bravi ala fìm gh’è l’aranciata…”
Ala sera se ripaséva davanti al capitèl,
mèzi endromenzi, zà pronti per ‘l paióm.
En dì, pù ‘nvanti coi ani e anca de panza,
ho provà, ‘n bici, a nar a “Salve Regina”,
no me crederè, ma ve la conto l’istéss….
ho vist la Madona vegnirme encontro neh.
Ero strach mort, ancora poch soto i Gàzi,
de colp me vedo davanti quela santa dòna,
con ‘nsugamam bianch tra i so bràzi….
semper pu vizina, che paréva ‘n fantasma.
“Te l’avevo dìt, zamai te sei vecio e gròss,
co sto vent frét po’ te ris’ci na bruta dòja”.
Coi òci serài dal sudór e la carne gréva,
vardo mèio… diaolporco l’èra la mé spósa.
