QUANDO FINIS L’AMOR

Pol capitàr de colpo

senza gnanca saver perché

come na scortelada ala schèna

o piam piam, come en lumin

che se smorza

perchè oramai è finì la cera

Se resta a ogni modo

ensemenidi, svoltolai su

Coi oci averti, fìssi, destràni

che no i sa pù cosa vardàr

Co la boca empastàda

zerto, colpa del vim

o de tuti quei misciòti

che ciàpa subit el stomech

Ma soratut encagnà da parole

arivae drìte nel zervèl

come frecie ‘nvelenae

gualive a quele tiràe

Te moverai alora le mam

en zèrca de qualcos

che sol en quel moment

te capirai, zamài tardi

no ‘l ghè pu, l’è nà via

Tra qualche temp

pensando a come

s’è spacà quel toch de Paradis

te te darai del mona,

te vegnirà el magòm

O magari, se t’hai trovà

n’altro amor, chisà …

te ghe riderai su

Ma sol per scònder

i sgrisoi che te gh’ai

quando el cor el tira fora

quel disco così bel

ma adès demò rot