di Cornelio Galas

No m’è mai piasù i osèi ‘n gàbia
fim da bocia i me féva tant pecà
perché no me par tant roba sàvia
tegnir en presóm chi colpa no gà.

Prové voi a nasser co le vòsse àze
a sgolar subit senza pareane entorno
e de colp i ve ciapa, finìa la pàze
ve trové serài su,come ‘n d’en forno.

E zent che ve varda, e ride perdepù
voi saltè quel che podé su ‘l palét
che fòr da quela ramada no se va pù
che no vegna de sgolar el nof lechét.

I ve dà sì da magnar e demò da béver
no ocor zercàr lontam quel che volè
l’è còmot, i ve dis, chi denter viver
basta che cantéghe e pù bem che dové.

Fradèi e sorèle i varda dal de sora
i ha capì che avé fat na bruta fim
No i pol però darve da mam, a st’ora
no, l’è meio scampar dal vòs destim.

Ve resterà, quando narè po’ a paiòm
quei sogni destrani de quando ‘n dì
liberi, zoveni e la forza d’en leóm
nesuni podeva tegnirve mai fermi lì.

Pu de na volta ho zercà de liberarli
quei pori osèi tegnùi via per la càza
gh’era semper qualcum lì a zercarli
per po’ meterli de nof en quela caràza.

Ah se i òmeni i capìs cosa che suzéde
quel che n’osèl el pensa en quel posto
No i starìa a pensar che quel ‘l crede
d’esser content pitost che nàr arosto.

Forsi i averzerìa subit quela gàbiàza
e i lasserìa nàr en zel quei prisonéri
No sia mai che en dì arìva ‘na stàza
che mete a livél anca i capi dei fèri.

Bisogn saverlo: quei che sta al mondo
i è stai fati da um che ne voleva bem
Nesuni pòl torli via da sto girotondo
la libertà l’è ‘n dirito no ‘n de mem.

El val per òmeni, dòne e anca animài
per prài, montagne e ‘n dove abitém
el vàl per quel che altri n’ha lasài
perché no far polito fim che podém?