MISCIAMENTI

El cuciarim del cafè. Che miscia, miscia, piam piam. Entant che te sei mez ensognà. E te vardi senza veder. Come se al zervel no ghe arives i fili dei oci. El cuciarim el miscia, el miscia. Piam piam. Te pensi per to cont. A tut, trane che te sei sentà en d’en bar. Te pensi a quel che te par. Penseri che se miscia, anca quei, ma pu svelti. En po’ chi, en po’ là. Come en quela machineta che taia su le verdure vei for na papa de tuti i colori, de tuti i saori. Ricordi masnai. Robe da far domam. Robe che no t’hai fat ancoi. O che t’avresse volù far dese ani fa. Te te vardi entorno. E te te scorzi che anca el mondo l’è tut miscià. Tuti sbalotai, de chi, de là. Po’ ariverà quel che ne masna. Magari uno ala volta. Finirem misciai. Tuti ensema. Tuti gualivi, prima o dopo. Cornelio…varda che el te deventa fret…