L’Osvaldo e’l sior Zimmer

di Enrico Tavernini

Eh si, eh… Da piciol me ‘l trovavo sempre en mez e me domandavo semper: “Ma ‘sto Zimmer …  gh’elo da per tut?” E po’ ancora … “Ma quanti soldi gavràlo per gavèr sì tanta roba?” El sior Zimmer m’el sognavo la not. Altro che Babao …

Me l’enmaginavo picolot, con la barba meza mora e meza grisa. Cavei petenai co ‘i petardi e goza de mocim sempre che ghe penzolava dal nas, per cascarghe sul barbom bi-color. Osti tei …  dala descriziom me par precis a l’Osvaldo.

L’era n’amico de’n me amico. El saveva tanti proverbi, tipo “paese che vai… non me ricordo” e “rosso di sera… non me ricordo”. L’era el guru dei proverbi. Infatti no ‘l se ne ricordava gnanca un e ‘l li lasava sempre a metà e quando el li finiva, el li sbagliava.

E dentro de mi pensavo …  ma vot veder che ades vei fora da mò che el sior Zimmer l’era l’Osvaldo? Senti che bem che’l sona: Osvaldo Zimmer.

Mmmm …  me pareria en pel strana come suposiziom, ma vist che i se somiglia …  magari la supposta l’è giusta. Zio canederlo … A volte, a pensar mal ghe se ciapa en pieno. Alora fente che sia davera lu. Magari el feva finta de eser stupido, per non destar sospetti e sviar tuti i possibili rompi ovi, truffadori, remengarie e slambroti vari.

Magari l’era stà la sposa a dirghe de non star ala luce del sol, o magari l’era stà el so comercialista.

E se ‘nveze fusa stai i amizi dela briscola o de ruba mazzetto?  Ma per non saver è lezer né scriver, envezi non l’era lù? Che figura gavria fat se ‘n dì, vedendolo, magari per far el figo, l’avesa ciamà per nome davanti a tutti? Magari ero l’unico a non ciamarlo sior Zimmer e a conoser el so nome. Sat che findus? Saria diventà famos pu veloze de na scoreza.

Ma se ‘nveze non l’era lù, avria fat sol ‘na figura de merda? Va a saver come che ‘l avria ciapada lù o la zent. Che penseri da mal de testa che m’era vegnù.

Magari el se ciamava Genoveffo o Vircingetorige, tant per eser originali. Chi è che no g’ha almen n’amico con ‘sti do nomi? L’è piem el mondo, no? Ah …  me disè de no? Alora me sa che forse non l’è meio ris-ciar, vist che non ne ‘n broco una gnanca per sbaglio.

Pò, nando a scola e studiando el todesc, som vegnù a saver che zimmer voleva dir camera e l’è sta alora che m’è crolà el mondo ados e ho pensà: “el sara stà anca famos, ma ‘l dormiva sol, ‘sto sior Zimmer? Alor tant valeva che provavo a ciamarlo per nome, anca se magari non l’era quel giust.”

Da alora, l’Osvaldo Zimmer el me feva giust pecà. Ma non perché el se fingeva stupido, ma perché el pasava el so temp a dormir.

Ades torno a nar en te ‘l ort, prima che vegna masa strof e non vaga a cavar i ravanei de me papà, credendo de cavar i pomodori. Perché dopo chi è che ‘l lo sente?