di Cornelio Galas
Quando lezeré ‘sta letera no so se sarò ancora vif. Perché l’è zamai da ‘na stimàna che som en guera e no ghe la fàgo pù. Anca perché som mi sol contro tanti. E strach a forza de mover le mam per copar tuti sti nemizi che me vei contra. Eco, alora che me som dìt: “Scrivi do righe per quei che resta. No, no voi monumenti e bàle varie. Me basterìa lasàr de mi el ricordo come de n’om che ghe l’ha mésa tuta per schizar sta ‘nvasiòm. En font l’avrìa fat anca per el vos bem. Perché, me par, che sti chi sia anca nemizi de voaltri.
Sule prime, avevo zercà – sto chi l’è meio che ‘l diga subit – de trovar n’acordi, de far ensoma en modo de no begar, de no farghe mal a nesum. Ho butà lì segnai de fum per dir: da chi ‘n via l’è mio, da chi ‘n là l’è vòs. Finì la fumeghera, però, è tornà tut come prima. Co sti chi, coi so elicoterini, i so sarlàti che sponze, a zizegarme anca ‘ntant che lezevo el fòi per me cont.
“Basta, diaolporco – ho zigà ale tante – vardè che se me va zo le àze no so cosa vei fòra …”.
Gnente. Come se avés parlà a sordi che no capìs gnanca el modo de spiegarse a gesti. De pù: sti nemìzi i ha tacà via a vegnirme adòs anca dal zèl coi so elicoterini. A becàrme per scapar subit dopo entant che ‘n vegniva altri de drìo. Semper pu tanti. Semper pu zidiosi, cativi.
Gò mès le trapole, osc’ia, savèndo ghe i và mati per el dolz. Ma quando stèvo per schizarne me digo almen na ventina co le me bombe … tràchete i nèva via de colp fasendome, me par, anca dei ruti picoi en facia.
Fim che no gò pu vist. Som nà en garàs e ho tirà fora dala caséta dei atrezi tut quel che podeva vegnirme còmot. Da l’ucia ala nave grosa de fer, come se dis. Dal paraguide al mistér che sbara ciodi, dal scalpèl ala machinota per gratar el rùzen dale ringhiere, dal crich al laór che se dropa per meter i rebatini, dal cortèl per taiàr el formai (regàl del matrimoni mai dropà) ale rachete dei sci. E no l’è finìa. Nela botiliéta col spruzìm gò mès denter tut quel che sol se te ‘l tochi e t’envelena.
E su, ‘cramento, ‘su content e sicur del fato mio, come quei che no gà dubi su chi che vinzerà sta guera.
Tèi, ‘péna i m’ha vist i deve aver ciapà na sgarìa. Perché de colp i è nài via tuti. E ve dirò che gh’ero anca restà mal. Ero zamai pront a far na strage. Rabiós el giust per no averghe compasiom. Encazà che pu encazà no se sa come spiegarlo.
E tut che tàse. Pasà la ràntega ho mes via piam piam le me robe che zà la sposa la m’aveva vardà come se varda i mati. Riciàpo ‘n mam el fòi, empìzo ‘n zigarét, bevo anca ‘n cafè zamai deventà frét. Gnanca el temp del resentìm co la sgnapa che … i scominzia de nof a rugarme. Da tute le bande. Semper de pu.E i è pu tanti de prima.
Alora tiro fòra i me arnesi. E ‘n copo dése ala volta. No ghè alter che morti dapertut. Ma no me fermo. Me par de esser come e la l’Ida Leoni … no el Leonida tacà coi fili al Termo, sì volevo dir ale termophili. Mi contro tuti. Voi propri veder chi vinze adès …
N’ora dopo, strach mort, me sento zò. Gh’è spuza de tòssech dapertut. Ma som content. “Te verài – me digo – che quando ala televisiom i dìs che chì gh’è stà na strage i ghe penserà mili volte prima de vegnirme de nof al vers.
Se vede che sti chi no i varda i telegiornai. Fato sta che adès som circondà da sì tanti che gh’era prima, forsi anca de pù. No me resta che telefonar Khi Ghe Som Mi dela Corea alta. No per farme prestar la bomba atomica, no. Me basterìa sol quela machineta del flit che forsi là i dropa ancora. Se no ghe la fago però, fème per carità en favor: vendichéme.
