VIDEO
DATE DA MENT
Capita spèss
fin che se vive
de no saver pròpri
che cosa far
Te te trovi embroià
ciapà tra do fòghi
e dele volte
te resti stofegà
Nel dubi, caro mio
te dovressi
se te ‘l gh’ai empizà
dàrghe semper da ment
a quel che te sai zà
L’è na lampadina
che slùsega
lì, vizìm al cor
I altri no i la vede
ma ti, envèze
te la gai denòr
L’è quela che fa vedèr
la stràa dove nar
Ti vàghe demò drio
no farla strangossàr
Anca se l’è picola
e par che sia stròf
con quela te sei sicur
de veder el bel, el nòf
Pol darsi che suzèda
anca en brut gazèr
Te poi nar a vòlt
ma àlzete, per piazèr
Na volta ciapà l’ànda
no stà tornàr endrìo
Se no no te vedrài
el slusòr del Siore Dio
E anca se no te credi
en qualcos sora ste tère
no sta fermarte mai
su robe pu lizère
L’è còmot e pu fàzile
far quel che sùbit rende
enveze che rampegàr
tra sgrèbeni e fazènde
Ma te verài che se
te te darài da ment
te gavrài la paze
e, te prego crèdeme
te sarai pu contènt
