LA MINESTRA DE ZANZARELE

LA MINESTRA DE ZANZARELE

Ah quela che me feva me pora nona Maria … Voi, pisòti, no ghe la farè mai a farla sì bona. Gnanca mi per quel. Tut mal entant ve spiego cosa che le ì ste zanzarèle. Le zanzarèle l’è en pratica dei tochi de pasta. Ma no li fa né la Barila nì la De Ceco. E po’ no l’è che sia propri pasta. Disente che l’è dei picoi giòmi gnanca un gualiv a l’altre che se forma misciando ovi, farina de mais e brodo de carne. Le zanzarèlele gh’è zà pronte, crue, da còser. E per quel che so no i le vende gnanca (almen che … boh). Disente che le zanzarèle le se fa da so posta quando butè quel misciòt che v’ho dit nel brodo calt.

Alora vardènte demò quel che serve per far sta minestra per quatro:

• Dozento grami de farina de mais (quela de le panòcie, no del forment)

• Tre òvi

• Brodo de carne (o de dado se volè far pu svelti)

• Formai gratà (meio el Trentingrana)

• Sal

 Ades partin. Anca stavolta bisogna laorar de man. Entant sbatè ben en de na padelota i òvi (senza i gùssi neh, sol ciàre e ròssi) . Sbàter, sbàter ben … eco, butèghe zo pian pian la farina de mais. Ocio che no vegna fora fregoloti. E dai che ghe la fè. Fè cont de darghe el mestol zo per le recie a quel che ve sta proprio sule bale … vist che né pu en pressa adès? Bom. En cicin de sal. No massa. Quel che serve.

Entant en banda en de n’altra padela fè boìr el brodo. Col dado. O quel che avè dropà per far la carne a less (se volè anca zà pront el secont). Piam piam zò la pastela che avè fat e laorè col piròn en modo che vegna fora tante zanzarèle, capì come? No? Oscia, deve vegnir fora dei picoli giòmi d pasta no na roba grossa o tante robe grosse. Disènte che le zanzarèle le è come la pastina en brodo, capì adès?

Basta pochi minuti. Che no vegna fora en pastròc … Dopo zò nei piati (quatro). Co na bela spolveradina sora de Trentingrana gratà zo.

‘sa ghe bevente drio? Dirìa na sciavèta. Ma anca en merlotin. Dipende da quel vin che ve pias de pu. La coca cola? Barèa.