di Cornelio Galas
“L’è tut …na comedia”
Sesto tòch: Matìa Galasso (Gallas, Galas) el me trisàvol
Mattia Galasso
“Chi sét ti che me par de conóserte?
vèi pù vizìm che pòda vardàr bèm…
qualcòs nela facia e anca nei cavéi
me dis che sì, sém parenti per dasém”.
Quasi stremì da sta vóze ‘n po strana
alora me svizìno a que l’òm col pizét
e vedo che l’è vera, el me somìlia…
anca nel nàs, nei òci oltra al barbozét.
“Som el Matìa Galasso o anca Gallas
da mì è vegnù po’ tuta l’altra genìa
sol che po’ avé magnà for squasi tut
nesùni come mi, per forza l’è finìa.
Scólteme bem, Cornelio te te ciami?
Scolta quel che dis el to trisàvol
mai molàr quel che se gà en testa
se no i te mete subit, soto ‘l tàvol”.
-Va bèm, digo, ma come mai sét chi?
A cossa è servì soldi e tanta forza
se ades te trovo dent al Purgatori
come ‘n maróm, che se bùta la scorza.
“L’è na storia longhéta da spiegar
ghe volerìa ‘l temp che no se gà
la fàgo corta ma ‘ndrìza le récie
che no riconterò quel che ho contà.
Palazzo Galasso a Trento
Da vif som semper sta ‘n le batàglie
prim davanti e drio tuti i me soldài
no gh’è posto neh, en tuta l’Europa
che no sia stà mai pestà dai me cavài.
Vescovi, emperadori, prìnzipi e conti
tuti i me voleva, se gh’era da copàr
e anca quando qualchedùm m’envidiéva
prima o dopo con mi ‘l gaveva da far.
Madruzo, Valenstàin, e tanti generài
i m’ha semper dat tant da guerezàr
no l’era fàzile star semper en pè…
anca mi ho dovù ogni tant tramizàr.
Austriàzi, svedesi, spagnòi e danesi
bandère nela polver n’ho vist tante
zènt enfrizàda o co la testa taiada
en guera se sa, le mam no le è sante.
Te conto demò perché som finì chi soto
tut colpa dei gazèri zò nel mantovàm
da mesi zerchevem soto quei muri vèci
de farli vegnir fora, per sé o la fam.
Ale tante mi e me cugnà, el Giovàni
sem riusìdi a nar denter ‘n la zità
e alora via che la vaga per i soldai
robar, spacar…le done i ha violentà.
Mattia Galasso
Tre dì e tre nòt è durà sto bacanàl,
a forza de bever nesun stéva ‘n pé
po’ quel che gh’era n’l sem spartì
e na volta ciapà no l’è tornà endré.
Ma la maledizióm no l’è sol quéla…
ché n’altra bruta ho ciapà sul col
avevo comprà su a Trent quel palàz
fat però dal Diàol par tut da sol.
E da alora no som stà pù tant bèm
avevo anca ciapà massa scortelàe
stràch, senza nesuni da comandàr
som finì da sol, senza tante monàe.
Ah, se gavés ancor la me vecia forza
de zerto no starìa a pianzerme endòs
en sèla al caval e via come na volta
a tanti ghe farìa far la fim dele nós.
Me par envéze che dopo, tuti i Galas
i sia deventài gnèchi e polentoni
quei che scrive, quei che fa le foto
i feri i li dropa sol come marangoni.
Gh’è quei che gira coi càri gròssi
altri che ensegna ginastica a scola
quei che fa controsofìti e piastrèle
e quei che i comanda sol ala bóla…
No è vegnù for gnente da sta faméa
a parte enzigneri, dotori, contadini
l’è comoda star en pàze senza guera
e far casini sì, ma nei condomìni…
Ah no, ghe n’è stà forsi um dei nossi
che de mi l’ha portà envanti l’onor
Bruno me par el se ciamèssa si…
mort sul carrarmato del so batagliom
Ogni tant ricordéve del vòs Matìa
che gh’è ‘me quadro al Bonconsìli
vardé come tegno la testa su alta
e giuro, no l’è tegnùa su dai fili”.
San Romèdi l’era sta zìto fim alora
e zito l’è restà anca n’ora dopo
El me vardéva ogni tant da lontàm
come a dir: “Che parenti, por pòpo”.
PER SAPERNE DI PIU’:
