I BISCOTI DEL TIROL

(O BISCOTI TODESCHI)

No ocor dir alter. Basta vardar la foto per farse vegnir la voia de magnarli e, se sa, prima, de farli. Via alora con quel che serve per far tredese biscoti (moltipliché come sempre per do, se volè vintisei biscoti, per tre se ne volé trentanove … l’unica l’è savér la tabelina del tre).

Alora, preparéve:

-Trezento grami de farina

-Zentovintizinque grami de zucher a vel

-na presa de sal

-n’of

-Zentovintizinque grami de bur frèt

-meza bustina de levà

-tre-quatro cuciàri de marmelada de granzoni o zirése o fragole. Ma se volè va bèm anca la Nutela.

Alora via che ném. Miscè la farina con zento grami de zucher a vel, la presa de sal, l’of (senza gùsse), el buro a tochetini e el levà. Empastàr, empastàr fin quando ve vei fora en giòm de pasta bela lisia. Fèla polsàr n’atimin soto na pèza. Po’ col matarèl tiré la pasta fin quando la gh’à en spesor de quatro zinque milimetri (dai che no ocor propri nar lì col righèl … en po de ocio, oscia).

Ciapè po’ en bicer che el sia larch almen oto centimetri. E schizélo su la pasta en modo de far tanti discheti. Su metà dei discheti dopo ciapè en bicerin per farghe en busèt en mez…basta en buset atenti a no far pastìzi.

Entant empizè el forno. Portélo a 190-200 gradi . Metè i discheti (tuti, sia quei sbusai che quei no) su na carta da forno. Un vizin a l’altro ma en modo che no i se toca. E denter nel forno per dese minuti.

Ei pronti? Se pol tirarli fora? Deghe n’ociada oscia ogni tant almen. Eco tiré fora adès. Alora su quei senza bus spalméghe su la marmelada che pu ve pias o la nutela. Su quei sbusai na spolveradina de zucher a vel che v’è restà (v’avevo dit de dropar sol zento dei zentovintizinque gradi neh).

Po’ basta meter quei sbusai sora quei entreghi. E via che i vaga … En boca. Per trovar la so mòrt, poréti. Che i era anca così bei da veder nevéra? Ssssi anca emmagino che sté lì a vardarli o a farghe na cornìs.

Cossa beverghe drio? Ai popi coca cola, aranciata, chinotto, quel che i beve de solit. Voi però a ‘n moscatèl zalt podrésse ben tirarghe el col.