NOI, OMENI…

Podrìa dirte che ne volerém bèm per tuta la vita

che mai e po’ mai ghe sarà n’embròi tra noi doi,

podrìa dirte che narò ‘n del lèt sol con ti, con ti,

e che no te gavrài mai da dir su quel che farò…

Podrìa dir che fim che la mort no la ne spartirà

sarém sol noi, a viver ‘sta vita semper ensèma

e che anca dopo qualche barùfa farèm la pàze

perché el nos mondo l’è fat sol da noi, da noi…

Po’ te vedi come sem fati, soratùt noi, i òmeni,

pensém che quando le dòne le stà a nossa cà

le sia come n’auto che te seri la sera en garàs,

e che da lì no le pòda nar fora, senza le ciàvi.

E se suzéde che le ciàvi le done le le trova…

alora deventém come i diàoi, no capim gnent

arivém anca a coparle, perché così se deve far

quando le dòne – diseva vecie legi – le scàpa.

Scòltem veci dischi d’amor, ghe balém ensèma

fém fioi, gavém neoi, se fa a mèssa la domenega

ah che rider col zio bepi e le barzeléte sporche

e po’ ‘n del lèt, voltandose cui, spàle e gambe.

No se pol parlar de done copade sui giornài

sol per dir che l’è zamài ora de mocàrla lì,

se da chi a ‘n par de mesi la capita de nof

e alora no se farà alter che dir de una en pù.

Som anca mì n’òm, madona quanti sbagli…

anca quel de no aver capì chi me voleva bem

Ma no ho mai dat en sciàf a na dona, mai…

l’è stà meio averlo ciapà: la gavéva resòm.

Questa voce è stata pubblicata in Senza categoria. Contrassegna il permalink.