E ADES SEM CHI

E ADES SEM CHI…

Coronavirus: cosa è, sintomi e mappa del contagio - Open

di Cornelio Galas

Serài ‘n casa, col pipa cul, col teròr. Co le mascherine, i guanti. Lontani almem en metro. E zò alcol dapertut, anca de pù de quel che serve, anca de pù de quel che pol far mal al fegato. Perché sem chi, come guìndoi en gabia, come campane che no pol sonar, coi batòci che no se pol tocar tra de lori.

Sem chì, pu de là che de qua. Smaridi, spaventai. Che no se sa se quel che starnutìs el te fa becàr sta malatia. Che no se sa se ste mascherine le te fa stàr al sicur. Sém de colp come bestie sgarìe dal fòch. Che le zérca de scampar: se ciàva se te pesti qualchedum. Sém nel gnent del tut. Nel tut del gnent. Ciapài da novi penseri: che quei che gavévem prima par monae. I soldi, el magnar, la fim del més. E sti lezùi e studiai che i no sa dirte gnancora qualcos che sia gualif. Pù controli te fai e pù te trovi quei empestai. Mem controli, mem enfetài. Par squasi de zugar a tombola… sperando che no vegna fòra i to numeri.

No capìm gnent de quel che è meio far. No savém gnancora tuta la verità drio a sta rogna. I méte zo i nossi cari come bestie da sotràr en pressa. I fiori i te li regala, perché nessum pensa ai fiori ades. Stem deventando anca dele spie. Varda varda quel lì che core… ma pòdelo corer? Ah come sem méssi mal en sto mondo che ne paréva sì normale. Dove no t’avréssi mai pensà de patìr sti divieti, ste limitaziom. Dove, dala matina ala sera, parém tanti diabolik: se vede sol i oci. E i cavéi da taiàr.

Ah come ghe volerém bem, se spera, de pù ala vita, se passa sto temp de malòra. Se gh’envegnirém fòra da sta malediziom. No se pòl gnanca nar en ciésa a pregar, anca se no se ghe crede. Anca se te vegnirìa voia de domandarghe a Cristo de darne na mam.

Vegnirà en dì, che nei libri de storia, i parlerà de sto virus del 2020 (o del 2019?). E quei che li lezerà, neoi dei nossi neoi, magari i ne tolerà en giro. Per quel che avém dit, fat, scrit. Quando forsi bastéva sol darse na mam, senza far i tacagni, per vegnirghen fora ensema. Per aiutarne um co l’alter senza pensar ai soldi. Per volerne bem, almen na volta, senza enteressi…

Questa voce è stata pubblicata in Senza categoria. Contrassegna il permalink.