TRENTINI A L’INFERNO
“L’è tut na comèdia”
di Cornelio Galas
Dèzima contàda: I bròdi tòseghi de la dona Brigida de Zìmegh
“Osc’ia, San Romèdi, ne sénte pèrsi?
No sènto pù l’odór de carne gréva …
Me par, envèze, de sentìr ne l’aria
qualcós che dìs: nesùnì ‘l lo béva.
L’è come se qualchedùm ‘l preparés
‘n pócio per far fòr anca i amìzi:
“Vegnì chi, magnem e bevem enséma
no sté averghe de ste robe la tèma”.
E difàti, poch oltra quel scalìm
ne se pàra davanti na vecia bruta
tute sbrusèle, i cavéi spetenài
la ne varda mal e po’ la rùta …
“Mi sóm en Sant, no voi gazèri …”
dìs San Romèdi co l’órs lì tacà
“La faga pur quel che ghe sbrùsa
che noi dopo nem vers nòssa cà”.
La vecia, senza propri dir gnènt
la sèita a far i so strani mistéri
e noi en banda, ah senza fiatàr
come quei che no vòl mai gazèri.
L’è ‘n quéla che vedo, da vizìm
che quela dona l’è tuta brusàda
la facia, ‘l col e anca ‘l rèst
i è neri, scotài …na griliàda.
L’ha capì, ela, che l’ho vardada
ma no la scuérze col vèl la rogna
anzi, de colp la tira su la vesta
e se vede anca lì la so vergogna.
La mòla botìlie, colìni, tut quant
par squasi la vòga tirarneli ‘ndòs
dopo la se calma, i òci davèrti
e la ne averze de ela ‘l so marlòs.
“Mi som la Brigida, mai sentù de mi?
Per tuti ero na strìa de Zìmegh,
con quel che trovévo ‘n del bòsch
fèvo medizine, ma anca ‘l tòsegh.
Gh’era anca quei che me dèva soldi
per envelenàr la sposa o ‘l marì,
mi trapolévo con tute le me erbe
mai nesùni m’avéva per quel sgarì.
Che po’ no ero, semper lì ciapàda
a far veleni per copar qualchedùm
vegniva da mi anca le done sióre
per no far nàser fiòi de nesùm…
Dent ‘l me ort, erbe bòne e cative
bastéva dirme quale dovevo zernìr
se sa, miga a tuti ghe piaséva …
nar a paióm e ala matina po’ morir.
Mi ho fat semper, quel che i diséva
quel che i voléva, ala fim, da mi
Mai ho pensà de mandar ala mòrt …
quei che po’ pianzéva per tut ‘l dì.
Som stada mi, ala fim, a pagar tut
anca i pecài de zent che …. tàso
perfìm cardinài, re, prinzipése
podrìa anca farve dei nomi a caso.
Fato stà che quei i m’ha condanàda
come se fussa na strega da brusàr
eco perché adés me vedé chi tacàda
davanti a ‘sto spègio a sbrisegàr.
Come volerìa èser come ‘na volta,
bèla, en facia, de drìo, dapertut
far fazióm davanti a quei màsci
a quei che sui òci no gà persùt.
Quei cavaléri che de mi strangoséva
no i ha mòs ‘n dé, ‘l dì del fòch
Tuti i vardéva, co la solita céra
quela che tachéva, lì, come ‘n zòch.
Ah sì de sicur, gò mès dela mia
per finir chi, ‘m méz ai danài
Ma vi ve ‘l digo, no ste pensar
no gh’è chi tuti quei dei pecai.
Podrìa far nomi, cognomi e alter
de zent che adoréva el Sioredio
sol che na volta arivadi a casa
i diséva sol: “Questo l’è mio”.
Quando sarè de nof de là coi vivi
ricordeve bem quel che v’ho dìt
No gh’è mai stà, dopo Eva e Adamo
en paradìs en téra, sì ‘n bel sìt.
L’om l’è come tuti i altri animai
‘l magna, ‘l beve, e ‘l fa l’amor
Sol quando ‘l gode e ‘l sta bèm
ghe par che altri no gàbia dolor.
