El vèndro tra ‘l sédese e ‘l disdòto

di Cornelio Galas

Ocio che l’arìva. Domàm. Po’, se Dio vòl, sem a posto fim a febrèr del domilie … tra ‘l sédese e ‘l disdòto. No digo alter. Diré: “Elamadona, ma sèt superstiziós?”. Ve digo: “Afàri mèi, basève ‘l cul”.

No, no ghe credo a ste robe, e gnanca ai “piroscopi”. Che se i fùssa veri (i piroscopi, padèle che tèi denter, en calda, magnàri, sughi, sfighe e tut el rest) de fàto saréssem spartìdi en quele dése (dódese) tabèle. E i gemèi po’ i dovrìa far le istesse robe, per semper. Magari co la stessa dona … co l’istess òm. Barèa.

Ma lassàndo star sti dùbi, ve dirò che mi, fim che ho laorà al giornàl, en quel dì lì, stévo semper a cà. Perchè … perché no se sà mai, osc’ia. E difati, quele poche volte che m’è tocà nar en redaziom (perché qualchedum era malà o ‘n ferie, bastardi …) a dir poch la cronaca de Riva l’è finìa per somigliarghe a quela de Niu York: pache da oto, scrautamenti, sirene dapertut.

E miga sol quel: la bateria de la machina che s’encanta, el rotibale che propri quel dì te vei al vers dopo ani e ani (da l’ultim vèndro tra ‘l sédese e ‘l disdòto, se sa), la spósa zidiósa (pu quel dì che i altri), el cagnòt che ‘l càga en sala, el bocia che col motorim el và nele vérze, la ciàve che se rote nela seradùra, el cèsso che bùta fora aqua sporca. E podrìa nar envanti fin doman matina neh …
Ma – come se dìs – no l’è quela so mare.

Fato sta che stavolta sto dì el vèi propri prima dei me sessanta ani. E alora – dime ti se sbaglio neh – de sicur domam, con dó mam – me tocherò i zebedèi. De sicur domam narò via en costa, come quel che camina sui òvi. De sicur domam no narò de zerto en giro per el paés. Nè magnerò qualcos che poda nàrme de travèrs. No, domam, caserma rest, come se dis. Tut pronto, tut engiomà.

Anca perché zùga l’Italia del balóm – co la Svezia de ibravimovicc – e alora sia mai che la vàga mal. En par de tòchi de ài en boca da momolàr. N’òcio ala televisiom e um a quel che suzéde en giro. E ‘tènti ai giri d’aria. Almen fin quando no ‘riverà mezanòt e gavrèm sessant’ani, cramento.