Tra ‘l bi e ‘l ba

di Enrico Tavernini

Eh si … dele volte ne trovem al famoso bivio e dovem decider da che banda picar e non sempre se g’ha le idee ciare per tor na decisiom sicura e rapida. Anzi …  Spés capita che sem insicuri e ne fem tremìli domande. Ma se … e se ‘nveze … ma forse …

Barea!!! Va a finir che ne trovem né enfodrài e nè embastìdi. Tra oma e toma, apunto: tra ‘l bi e ‘l ba.

Capita anca che ‘sta situaziom la ne vei quando che magari noi vorésem gavér le idee ciare per eser sicuri de fàr la scelta giusta, ma sto slandrom de destim el ne fa i scherzi. Cramento … ma no gàlo de meio da far? Ma varda ti ‘sto monàzo !

Na volta me ricordo che ero dreo a far en misteròt e dovevo sceglier al volo se far en t’en modo o ‘n te n’altro, perchè s’era presentà n’imprevist. Alora mi avevo deciso de far oma, convinto che l’era la decisiom giusta, perchè mai e poi mai podeva nar diversament. Difàti, per na questiom scientifica che ciamerem sfiga, l’era nada propri en toma.

Quindi avevo deciso per el bi al zento per zento e ‘sto …  enveze el s’era trat en t’el ba. Le ostie e le madone che avevo tirà zo quela volta … me ricordo che s’era vist en zel do man che le aveva avert en doi na nuvolaza e s’era vist en faciom de uno con la barba, che l’ostiava anca lu, magari per n’ato de solidarietà en tei me confronti. Giust per render cont de quante che n’avevo dit.

Me ricordo che na volta ero anca riusì a trar la monéa per far pari e dispari, riusendo a ‘ncastrar la monea en te l’unica sfrìsa tra do bolognini, che gh’era en piaza a Dro. Ma se pòl? Anca lì gh’era na posibilità su ‘n miliom de trovarse tra ‘l bi e ‘l ba. Bom. .. mi gh’ero riusì. En quel caso però niente smadonamenti, ma tante risade dopo n’atimo de sbalordimento, ‘ndo che mi e ‘l me socio ne sem vardai ‘n tei oci senza dir gnent per zinque sei secondi, prima de rifiatar.

Po se podria anca usar ‘sta via de mez per quele afermaziom che sta tra el sureale e la cagada.

De quele ne trovem a josa. Tipo l’altro dì ero al bar e do vecioti i parlava de tut, tipo slambrot o pastolà dele galine. I era partidi a parlar de parchegi a Arco e i era arivadi a parlar de orti e cramenti vari. E i ne ha dite de robe … che al sol pensarghe, ancora rido. Ma lori i feva i seri. I aeva dit anca che l’opera pu bela l’era l’Heidi de Verdi. Mi ero lì sentà zo tacà a lori e me som permesso de dirghe che no l’era l’Heidi, ma l’Aida. E ‘sti do fenomeni i m’ha dit che ero en pisòt che non saeva gnent e de star zito.

Por Verdi … me sa che gnanca lu el saeva de aver scrit n’opera su na putelota che la viveva sui monti col nono, tra pegore e cavre. La marcia trionfale sarala stada quando l’Heidi la gheva dat la patasgnacola a Piter? Altro che tra ‘l bi e ‘l ba. Chi sfiorevem l’asurdo. Ma fente che va bem lo stes e l’empizem, come ‘n quel famos quiz dela televisiom.

E de quel che se trova sempre en mez come el zobia? Ne volem parlar? Anca chi podem usar el paragom de cui parlem. Ma el “de cui” no l’è inteso come de quei che no i sta con le done, ma sol coi mas’ci, tant per eser chiari da subit e no eser fraintesi.

E quei che ‘nte la vita no i pol eser catalogai perchè i è eterni indecisi o i gira en base al vent dei so enteresi? Quei che se ghe dis che no’i è né enfodrai e né embastidi? Anca quei lì i è tra ‘l bi e ‘l ba.

E chi la list la seita a slongarse e i modi de dir anca: che i sia personali o usadi da mili persone no conta gnent, perchè anca el pu famos modo de dir, en partenza l’era usà sol da ‘n falòpa e basta, fin quando po l’è sciopà e deventà famos.

Mi el mio l’ho ciapà da ‘n vecio film de Nino Frassica, vist che’l gheva la comicità tipo la mia, tra l’asurdo e ‘l surreale.

El gavevo scantonà en te n’angolim del me zervel e ‘l m’è saltà fora en dì che volevo dir qualcos de diverso dai soliti modi de dir e … zak … el m’è saltà fora da sol. Che bela roba che l’è ‘l zervel. Così misterios e complicà. A volte el ne lassa a pè per dele monae e a volte el ne dimostra quel che ‘l pol far quando che l’è en forma. ‘Cramento … Anca lu tra ‘l bi e ‘l ba.

Anca quando se dìs che ‘na roba l’è longa tot e migole, o che na roba la costa do e zinquantatre … anca lì, le migole ‘l te fa meter la roba tra i do nosi amizi, che ala fim nei trovem sempre come el zobia.

Quindi viva ‘l bi e ‘l ba.