Tolévela de vòlta valà …
di Cornelio Galas
No so voi, ma a mi, quando ho lèt sul fòi che quela scòla – fàta con tanta fadìga, en prèssa, ma come Dio comanda -, a Amatrice, dove gh’è stà quele disgrazie del teremòt, no la serve pù, m’è vegnù ‘ntorno a dir poco en nervòs de quei che, se i m’avés mès do fili de la luce nel nàs avrìa dàt la corente a tuta la Busa e forsi anca a Roveredo.
Piàm: ho zamài lèt anca quel che spiega, su sta stòria, el sindaco de quel paes dove no è restà ‘n pè gnent. Ma no ho cambià pù de tant idea. Anzi, a dirla tuta, m’è vegnù altri dubi. Perché, ala fìm, cossa èl che cambia? No i la spàca su quela scòla, no. I la smónta. E i ghe la dà de volta a la Proteziom Zivile del Trentim. Se demò la podéssa servirghe dele volte …
Capìntene: i gà dìt grazie a tuti quei che – passando zó là magari le so ferie – subit dopo el teremòt i s’ha dati da far a farghe su na scòla dove i putelòti i ha podù nar en sti ultimi mesi. Ghe mancherìa alter … Però, disénte, l’è ‘l modo dai.
L’è véra: adés la Ferari dele machine (no quela del spumante) la ghe méte tanti soldi e i farà su en liceo nòf de pàca, co la so palestra, co i so bei servizi, con tante robe che là zò i se le sognéva anca prima del teremòt.
L’è vèra: a parte le fondamenta de cimento la scòla fàta dai trentini l’èra tuta fàta prima (e po’ postàda zò) en legn.
Ma diaolporco, da chi a far passar quela nòssa zènt che l’ha fàta su per la famosa impresa “fà e desfa”, dai …
Che po’ no par che sta scòla de legn la sia propri tant na fìla de capàni per nar a càza e gnanca come quele casòte che te compri al Brico per meterghe denter i atrèzi e el mistér de l’ombrèla tant perché cosìta no i se bagna.
No, l’è n’ambaradàm pù serio. I ghe l’ha fat veder – con sodisfaziom ? Varda quel che avém fàt coi soldi e ‘l sudòr dei altri? – anca al prinzipe Carlo de l’Inghiltera. E po’ i n’ha parlà e scrìt per mesi, come de na specie de miràcol. Ensóma, no l’era en giòm de tende che, cavài i pichéti, po’ te porti vìa e t’enmùci en qualche magazìm.
E ‘nvéze questo i dìs adés: “No la ne serve pù sta scòla. Vegnì pur zó a smontarla, a portarvela via. Podé semper dropàrla en caso vegna n’alter teremot o se ghe n’avè bisogn, che ‘n saénte, per qualche festa gròssa dale vòsse bande …
Quei che quela scòla i l’ha fàta i ha momolà qualcos ma no i ha – me par neh – sacramentà come forsi qualchedum al so posto l’avrìa fat. I ha dit sol che smontarla non l’è, come dir, zàc e tàc. Gh’è soto na bèla getàda de cimento, po’ fili e canalète, i so bei impianti. E se risc’ia tut mal de dover butar via tanta roba. En pecà no?
N’altra roba: no se podéva lassàr lì quela scola de legn e far el liceo nòf da n’altra banda. E dropàr la scòla dei trentini per qualcòs de alter? I dìs de no. Che zamài la Ferari (ghe mancherìa alter) la và de corsa, che ensóma no gh’è pù gnent da far: nar che nare, prima se cavà su quela scola de legn e meio l’è.
No l’è per méter el dé nela piaga. Ma me domando: méti (per carità no me l’auguro neh) che ghe sìa (meio che no ‘l ghe sia) n’altro teremòt o aqua che porta via le case da qualche banda. E meti che i ciàma ancora la Proteziom de Trent. Prima de far na scòla come quela de Amatrice ghe penserìa su n’atimin.
Magari en colp de telefono a Marchionne: “Scolta, gàt en ment de far en liceo nof coi to soldi da chì a pochi mesi? No sàt, l’è perchè così savém regolarne. Envèze che carpentéri manderéssem lì en par de Tir co le tende e le cosìne dei Nuvola. Ah, se sa, le cosìne dopo le ne vèi de volta …”.
Sisma: scuola Amatrice, quasi pronto tetto. E si fa liceo. Provincia Trento, tetto dal 26 settembre, liceo a metà ottobre. ANSA/UFF STAMPA PROVINCIA AUTONOMA DI TRENTO
A view of the internal rebuild school at Amatrice, 13 September 2016. Trento Region build a new school made by containers for the quake victims who need to start the new educational year.
ANSA/MASSIMO PERCOSSI
