SAORI: “I BASINI ALE VIOLETE”

L’è squasi primavera. Se pol piam piam molàrse fora. E nele campagne, denòr ai murèti, qualche violèta, qualche primula se scominzia a vèderla. E alòra l’è temp de basi tra ennamorai. E anca de “basìni ale violete”. Cossa elo sti basìni? Basi picoi oscia, no ghe se vol la scala per capirlo. Disènte come i basi perugina dai ma fati en modo diverso. E perdepù co le violète che zà te senti ‘l profumo prima che ‘l saòr en boca.

Sta ricèta trentina l’ho trovàda sul susidiario de le osterie trentine. El l’ha fat el Nereo Pederzolli, quel col capelon, ben mès, giornalista del Tg regionale oscia. Quel che va semper drio a robe naturali, nòsse, e anca a vini, magnàri. Ensoma, el Nereo …

Quanti ei quei che voleria tastar sti basìni? Nesuni che dis gnent. Ah no so se ‘n vanza neh. Po’ no stè robarghei ai altri per piazer. Disente che per quatro-sei che magna ghe se vol alora:

• N’eto de mandorle

• Na ciara d’òf

• – mez eto de zucher

• En pugnèt de violète de camp (no stè nar da quel che vende fiori dai, che do passi per zercar le violète i fa anca giust ben …)

Ve digo subit che tra preparar el tut e cosinàr ghe se vol tre quarti d’ora. No stè farli a l’ultim minut…

Come se fa? Ciapè le mandorle e tièghe via la scorsa. Anca quela pelesìna en tra mèz. Massa casìn? Scoltème mi: bagnè le mandorle en acqua tèpida … no ho dit de farle lèss sol de bagnarle en ci cin ne l’acqua che no scota così le pelè meio.

Netà le mandorle pestèle de brut con qualcos de dur. Deve vegnir fora en gramolà gnèch, no tanti tochetìni de mandorle duri. Adès metè le mandorle pestàe bem bem en de na scudela granda e lì denter sbatè ala svelta la ciara d’of butandoghe denter anca el zucher. E via che l’è en bel viazàr col frustin … alè che l’è ancora prest. Darghe de brut. Vers la fin zò anca le violete. Quante? Dipende dai vossi gusti…basta che no vegna fòra en pastìz de viole al saoir de mandorla e zucher e…anca de ciara d’of.

Quando sta pastèla l’è bela morbida fè su co le vosse manote tante polpete picole. En mèz, co ‘n dedòt, ghe fè el segn del basìn … disente che en diametro de quatro schei (zentimetri)el podria nar.

Tut su la piastra calda (dovè averla scaldata prima) en forno. E lassè che i vaga, piam piam, no a mili gradi, tipo foch bas,fin quando no i ha ciapà en color dorà. Zalt oro. En pratica l’è come far i “spumòni”, quei co la gresta. Ah, per guarnìrli, perchè i faga faziòn, podè tegnirve via qualche violeta. Ma anca na spolveradina de zucher a velo (semper quel vanzà dai pandori de Nadàl …) el ghe stà ben come ‘n baso col rossèto de l’amante su le sguanzòte de vos marì o de ‘l vòs moròs. Sol che dopo … altro che magnar basìni. Me sa che la finirìa malot.

Bom: ‘sa beverghe drio? Trentino Moscato Rosa el dis el Nereo. E mi no ghe penso gnanca a contradirlo.