SAORI: el “TIRTLAN”

 Che ‘n disè de farve na bela magnada de “tirtlan”? Cossa che l’è el tirtlan? Disènte che l’è na roba da magnar, bona, che i fa en Val Pusteria, su en Alto Adige. Ma i sa farla anca i ladini. Che i ghe ciama enveze “turtes”. L’è ala fin dei gran ravioloni, friti, pieni de boni saòri. V’enteressela la riceta? No? Alora basève el cul. A quei che ghe spìzega la curiosità enveze …

Entant preparè:  zento grami de farina de segale (la trovè, la trovè … no stè preocuparve che la trovè), po’ zentozinquanta grami de farina de frument, en cuciar de oio (semper meio quel del nòs, extravergine de l’alto garda, ancor meio quel de vignole se sa), n’of, en po’ de late tèpit e sàl. Tuta sta roba chi per far su la pasta che po’ servirà per meterghe denter el rest.

Per el rest, el ripieno ensoma: en cuciàr de buro, trenta grami de zìgola taiada su fina fina, dozentozinquanta grami de ricota, zento grami de patate cote e passàe, en cuciar de santìgola, si ensoma, de erba zipolina, sal e pever. Dai che no avè spendù chisà cosa…

E alora, con quel che v’ho dit de preparar per la pasta scominziè a empastar. Su, ìe, che fa ben moverse … avanti e endrio, endrio e envanti… lìsia la deve vegnir fora sta pasta, bela lìsia… ve pàrela lìsia? No, enveze, dai che podè far de meio… eco, adès lassè polsàr tut per na mezoreta.

Entant podè preparar el ripieno. Sfriteghè en de na padela la zigola col buro. E butèghe denter po’ el rest… misciar ben che no se taca zò tut.

Ala polsà el giust la pasta? Ben, voi però no podè polsar perché adès vei el bel. Da la pasta dovè far vegnir fora tanti dischi. Come? E quant grandi? Ciapè en piatìm dela chichera del tè, pozèlo sora la pasta e neghe entorno col cortel… se no ciapè na scodela granda precisa e schizèla su la pasta… Fati i dischi? Bon, empizè el giradischi e scoltèvei ahahahah. Dai che scherzo. Ciapè en disco, metèghe denter el ripieno (no massa, oscia, che po’ vei for tut). Sòra n’altro disco. E struchè entorno entorno. Po’ butè sto raviolon nela padela dove l’oio l’è calt, calt. Nò che el fuma però. E quando i ve par pronti (sel vede dal color) tirèi fora e metèi su na carta che suga. E via che la vaga.

Cossa beverghe drio? Na bela sciàveta i me dis. E se no alzè massa el gombet va ben anca en marzemin de Isera. Basta che la botilia no la sia massa alta… de drìo. Bom… ala prosima.