SAORI, EL CAPUC

No sò se ve ne sè scòrti, ma su le vigne pian pian scominzia a cresser le foie. Pìcole, se sa, ghe se vol temp perchè le deventa grande e ancor de pu perchè sòto buta fora l’ua. E alora stèghe drio a ste cresùa. Ogni dì, me racomando. Perché quando le foie dele vigne le sarà grande asà, podrè far el capùc (o caponèc o capùss). Quel che conta l’è tiràr zò sti “pampeni”, ste foie de vigna grande, sane, no sbusàe, propri poch prima de meterse a laorar en cosìna. E dopo averle lavàe, se sa.

Cossa ghe se vòl per na desìna che magna? (fè la metà per zinque)

– vinti foie grande de vigna

– zinque eti de pàm vecio

– oto èti de erbète o bietole (vardè voi le erbète che pu ve piàs tegnì pront e anca prezèmol per misciarle)

– zinque eti de formài “spressa” stagionà (da gratàr zo)

– zinque ovi

– do eti de buro

– en tòch de ài

– n’eto de uèta

– sàl e pever

– qualche metro de sogàta (spàgh)

Quant ghe meterè per far sta rizèta? En pàr de ore. E alora sùbit a far giràr le manòte.

Entànt ciapè le erbète e – dopo averle lavàe ben, taièle zò fine fine ensèma al prezèmol). Po’, en de na padela granda, en qualcos che ghe stàga denter tut, misciè le erbète ai òvi (spàcai prima e senza gùssi), l’uèta, el pam e ‘l formài gratà.

En banda, en de na casseròla, frizè l’ài (pestà, schizà) nel buro (ocio a no brusarlo el buro). E dopo butèghe zò quel che avè empastà (le erbète e tut el rest). Misciàr, misciàr, misciàr ben che no se tàca zo gnent. Fòch bàs. Ancora, ancora. Deve vegnìr for qualcos che no sia na ròba fata tant per far. Bela da veder. Con tut quel che avè fropà ben miscià.

Ve pàr che ghe sènte? Bom, alora lassè n’atimin che sta pasta la se sfrèda e po’ co le manòte fè de le sort de gnochi a forma de retàngol. Quant grandi? I deve starghe en de na man. E soratùt denter na foia de vigna. Eco, metèlo denter sto gnoch ne la foia, adès col spaghèt, co la sogàta, fè come se fà de solit co l’arotolato arosto. Lighè su tut come en salàm.

E dopo tùti sti gnochi ne la foia i và messi en de ‘n pentolòn dove avrè prima fat boìr acqua col sàl (quant sàl? come ve pias).lassè nàr per n’orèta, a fòch bàs, pian pian. Po’ tirèi fòra, lassèli sfredìr, sughèi. I và magnài frèdi. Magari taiàdi a fiète se no gavè la bòca granda. Sòra ghe stà anca en fil de oio del nòs (del Garda se sa). Ah, va ben anca en formài stagionà da gratr zò, ma la “spressa” dele Giudicarie sarìa el massimo.

Cossa beverghe drio? En bon teròldegh rotaliàn. Se nò el capùc no ‘l se nega subit. E magari el ve stòfega voi enveze, capì come?