SAORI, EL “BRAMES”

Spègio spègio de le me bràme qualo èlo el dolz pù bom del reame? Ma gnanca domandarlo: ‘l bràmes. Che i lo fà i ladini. E che … ma spèta che ve spiego ‘ntant cossa che serve per òto che magna: l’è tanta la roba stavolta. (Se sè ‘n quatro che zàca fè la metà de tut …).
– trentazinque dezilitri de làte
– trenta dezilitri de latesèl (‘l trovè al supermercà … ‘l trovè …)
– tre eti de pana fresca
– 70 grami de buro
– mez eto de mèl
– mez eto de farina de segale
– ‘n pòm
– tre fete de pan de segale
– en cuciàr de semi de papavero
– en cuciàr de ua pàssa
– canèla
– sal
Per far sto dòlz ghe se vòl tre quarti d’ora, pù ‘l temp per sfredìrlo, perchè el và magnà frèt.

Dai che tachèn via demò. Scaldè ‘n de na padèla el late, el latesèl e la pana, e miscièghe denter ‘n po’ ala volta, en tochèt del buro che avè preparà ‘n banda ensèma ala farina segale. No ‘l deve boìr prima che avèghe mes zò anca ‘l mèl, i semi de papavero, l’uèta e ‘n po’ de sal (pèna pèna …). Eco adès misciè, fè boìr, e dopo fè còser el tut (senza che ‘l vaga per sòra) ancora per qualche minut. Oh, entant misciàr neh … misciàr. Po’ via la padela dal fòch. E preparè (prima magari …) oto piati fondi (quei per la menestra i va ben). E butèghe denter el “brames”. Che sia porzion gualive se no magari qualchedun el ghe n’ha dopo a màl. Spetè n’atimo che no ‘l fùma pù nei piati. E dopo denter tut nel frigo (no gavè posto? Alora lassèli lì almen per n’orèta, i deve sfredìrse oscia). Quando portè en tàola sto dòlz, taiè prima a dadèti le fete de pan de segale e ‘l pòm (dopo averghe tirà via la scorza, se sa). E fè sfritegàr ste robe chi (no quel che se sta sfredàndo nei piati neh) en de na padelota con denter en poch de buro (quel vanzà), canèla e propri en pèl de zucher. Sta roba chì calda la và pò butàda sòra ai vari piati. Po’ basta en cuciar per magnar … co sta bela gròsta tipo crema catalana sora da ròter.
Cossa beverghe drio? Vin sant diaolporco … se no gnanca mèter en tàola i bicièri.