di Cornelio Galas
Alto Garda, 2042
-Ehila chi se vede … ‘n do vàt de matina bonora? Zà for dal lèt? Ma se te sei péna rivà da la Mèrica …pòlseghe sóra no.
“Come te disévo ieri, che ne sèm parlà co la televisiòm, bèm, te dirò che dopo tanti ani en que l’ospedàl lavìa me sènto propri bèm. Oh, na bèla revisióm neh … candéle, alimentazióm, i agègi nel zervèl. Tut a posto come se gavés vint’ani osc’ia”.
-E ‘l viàzo?
“Ah come nar a Zenìga e vegnìr de volta. A pè se sa …sì ‘n po’ stormenì perché i te sbàra col ràzo, ma … ti pitòst, perché no vàt anca ti qualche am en Merica. Varda che no l’è che ‘l costa n’ira de Dio neh …sì, va bèm, te dèvi stàr via en pezòt, ma quando te vegni de volta caro mio l’è come te gavési vint’ani en mem, tirandoghe via anca quei pasài da quele bande”.
-Ma sì, ghe penserò su, ‘sa vòt, zamài son afezionà a sto lach, a sta Busa che mòverme sarìa giust en pecà.
“Tira e mòla te gài anca resóm per quel. Là en Merica i me par tuti dei robò neh, con quei fili tacài ale rècie … ma dìme, come vàla chi da noi?”
-Làssa star valà …
“Elamadòna … no me par che se sia restà tant endrìo rispet a altre bande”.
-No l’è quela so mare. Sét nà a farte en giro zo per Riva?
“No, no gavù gnancora temp per quel”.
-Dai vèi con mi che te fago veder …
(zona lungolago)
“Eh osc’ia, ma no l’avévei batùda zo la ex Catoi?”
-Eco, vèdit. Sta fìm chi l’ha fat sto posto.
“Ma, se no me ricordo mal, no dovéva vegnir fora qualcos de gros e bel? No gh’era anca quei su da Bolzam enteresài?”
-Ah per quel paréva che néssa tut per el vers giust neh. El progèto del … del Cecheto …
“Come el Cecheto, quel che cantèva “sonar, cantar, basàr, maciomen, saludàr …autostop”…”
-Ma no, el Cecheto, quel che avèva fat el progèto per quei da Bolzam e prima ancora propri (per el Comum) quel de tut quel che se podéva far dala spiàgia en dénter, ensoma quel che savèva dove meter le mam, come moverse, cossa se podeva far e cossa no, se sa …
“Ho capì … ma perché adès chi gh’è ancora sgrébeni e muri che vèi zò?”
-Perché te sai no che i voléva far le robe grande … botèghe gròse, e quel che no me ricordo zamài pu.
“Sì, si me ricordo. E i era n’hai de fato d’acordi anca col Comum, gh’era el Mosaner sindaco no?”
-Sì, brào. Tut mal i avèva fat su la so bèla, gròsa costruziom, per quel. En mèz anca i so vialéti co le palméte, la so giusta iluminaziom, tut bel a vardar.
“E dopo?”
-E dopo … no i ha fat i conti col mondo che cambia caro. Adès se te vòi compràr qualcos basta che te schìzi do tasti sul compiuter e ‘n do ore te gài el corier che te lo porta a casa. E a Milam no serve gnanca el corier perché i gà quel nastro che va e vèi dale fabriche. Basta che i slonga la mam e i schiza n’altro botom.
“E no podèvi far na roba del genere anca chi?”
-No i gà pensà. No i gà pensà osc’ia. Gnanca dopo che quei de la Coop lì vizim i è nai dal balóm su drit per la stessa roba.
“Cramento, anca quei de la Coop te me dìsi …e ‘sa ghé adès en quel posto dove gh’era prima el Gentilini?”
-Toh, dai che fém do passi e te fàgo veder …
“Eh madòna, tut viléte?”
-Sì, e se te vardi bem gh’è viléte anca dove gh’era la Cartéra … che la gà vendù tut a so temp … no me ricordo, ma l’era um pièm de soldi da ‘n zó.
“E vers Torbole?”
-Ah varda, no vàl gnanca la pena slongàrla fim là, meio tornar a me casa che te fàgo tastàr el me Nosiola … crédeme, te vegnirìa en gròp al stómech.
“Eh cos’avrai fat pezo de chi, mostro …”
-Te digo sol che el Comum de Arco l’aveva fat tante e po’ tante getàde per no esser da mem de quei che aveva trovà l’aqua minerale lì vizim …
“E alora?”
-E alora co l’ultim dei scorlóni de teremot zó dal Briom è vegnù zó mèz mont che l’ha schizà tut quant … e per fortuna che nesùni gh’era lì en quel moment, i dovéva ancora taiàr el nastro per quele viléte.
“E dopo?”
-Dopo caro no gh’era pù i soldi per farne de le altre, ma soratut quei da Trent i gà dit: “No volerè miga che dopo quel che è suzés ve dénte de nof i permesi …
“E adès?”
-Ah prima de tut i è nài envanti a begar per ani. Con quei che l’aveva semper dit che bisognéva farghe en valtòmela, no, en valtòmelo, ensoma en val tomo qualcos che tegnìs bòta ale frane. Pò ale tante, qualcheduni col calcagèra l’ha livelà tut, l’ha portà via i materiài che déva fastìdi e dopo aver restelà en po’ de tera bona che gh’era lì vizim i ha scominzià a somenàr ...
“Cosa?”
-Osc’ia lì l’è stà semper na zona bona per i bròcoi …
