QUANDO S’ENVECIA …

QUANDO SE SCOMINZIA A DEVENTAR VECI …

Finìs, diaol de quel porco, che te par de parlar come to papà, che no gh’é pu, come to nono, che no gh’è pù propri da ‘n pèz. Ensóma, guaiapòrcole, piam pianìm, te scomìnzi anca tì a nar coi penséri pù endrìo che ‘nvanti. A mónzerghela a quei pù zoveni: “Ah, la gavé grassa al temp d’ancòi”. A farse anca rider drio: “Pòr om, da quando no ‘l scrive pu sul giornale ‘l s’è come enmucià, che bruta fim …”.

Po’ la matina, quando te vai a béver el cafè per lèzer i giornai a sbafo, te vardi semper quel panèl en piàza a Bolignam. Dove gh’è su quei che è mort. Oscia, te disi da per ti, anca quel … meno male valà che anca ancòi no ghe som su mì en mèz a quei avisi. Meio tut mal controlàr tute le matine, neh … Meti che te mori e nesuni te avisa. Meti che te vèi ‘n colp e nesuni te dis che bisogn crompar la bara, pagar el Comun per la tomba, pagar l’òbit. Meio savérle prima zerte robe. Che no, no, no volerìa mai lassar debiti endrìo. No ho mai desmentegà dei soldi che ghe devo a zent che ha laorà per mi. E a parte le fugazète robae al liceo de Riva … no, no me par de doverghe gnent a nesuni.

Ma no l’è quela so mare, no l’è quel el concèto, come disèva el Flavio Corradini da Vigne quando se nèva su coi motorini en Mandrea a far finta de far motocross.

L’è che, os’cia, ogni dì che passa te te senti … te te senti, come dir, pù vizin ala fin che a quei dì che t’eri putelòt. Ensóma, te par che tante gàze le sia zamài nade. E che no ghe ne sia envanti altre che le stà dove te stai anca ti. Te vei el destràni denter. Se te pensi a quel che t’averéssi volù far e no t’hai fat. A quel che t’hai fat malament. A quel che te fai adés, magari butando via temp e soldi per gnent … se doman no te ghe sei pù.

Po’ l’è anca vera che qualcós t’hai fat dai. Qualcós s’è dat anca a quei che resterà dopo de ti. Magari na ridua. Magari n’idea. Magari anca brute parole, che tut mal le è semper en ricordo no? Se me fa paura la mort? No, dai, ensóma, dàmela tòmela … os’cia se la me fa paura. E tant anca. Mi spererìa bem, na volta arivà de là, de trovar San Pero co la moka del cafè come se vede en televisiom. San Pero che te dìs: “Anca ti ala fim te sei vegnù de sora, ma no dovevìt arivar doman?  … speta valà che ghe digo ale suore de prepararte el let”. E trovarse dopo con quei che è nà su prima de ti. E tuti quei che te conossevi che i te domanda: “Ma ala fim, sta Lopio-Busa” l’hai po’ fata?”

No gh’è gnent da rider, ‘cramento, podria anca suzéder ste robe chi. Entant vago envanti valà. Come un che scominzia a deventar vecio. Come un che n’ha vist de tuti i colori. Come un che ghe piaserìa tant, ma propri tant, prima de nar dove no se sa, veder en mondo divers, come quel che se canteva nei ani sesanta. Ma forsi gnanca noi, alora, ghe credévem sul serio.