NADAL A L’OSPEDAL DE ARCO

STORIE CHE NO SE DOVRIA CONTAR A NADAL

di Cornelio Galas

La Maria. da Ciaràm, l’era zamài da mesi restàda sui zòchi. La l’avéva savù, ale tante, dopo aver fat la prova co le robe che i dà en farmacia, dal dotòr Gabriele: “Eh sì, no gh’è dùbi, se la vòl però conosserìa en colega a Roveredo che per poch, senza tant brigar e parlar, el podrìa, disénte, risolver zàc e tàch, el problema nessì …”.

Ela, la Maria, no l’avrìa mai copà gnanca na mosca. Figurarse el so bocia. La seitéva però a domandarse: “Ma come pòl esser stà … che pù che basàrse col Bepi, el marangóm … no, no gh’è stà alter. No me par almén…sì, ghe l’ho tocà dele volte. Ma s’è netà tut subit col mantìm … no, no pòl propri esser”.

Passa i mesi, e la Maria zà la véde sta panza che s’engiónfa. E po’ el mal de stómech. E po’ la vòia de fragole anca se no l’è propri la so stagiom. E po’ … le stornìsi, na fadìga bestia a tirarse su dal let.

Dai e dai l’è tornada dal dotor: “El sènta, mi no stago gnent de bem …”.

-Ma la dovrìa polsarse … nesùni che ghe dà na màm en casa?

“Ma me sento fiaca, no riésso gnanca a far le lavatrici …”.

-La stàga calma, e tut mal la tòga zó ‘ste pirole, che le fà bem.

E arìva i dolori, se rote le aque. Bisogn nar de prèssa … El Bepi el porta la Maria, de corsa, su la so Punto, a l’ospedal de Arco …

“Ma benedéti – ghe dìs n’infermiera – no ‘l savè? L’è da mesi demò che chi no gh’è pù el punto nàsite….”

E alora? E alora? La Maria no la stà pù gnanca ‘n pè. El Bepi che sèita a fumàr al de fòr del pronto socorso. E po’ no ‘l ghe la fa pù, el gòsa: “Cramento, ma èlo posibil che se dèva ridurse a ‘sti passi?”

L’elicotero no se pòl ciamarlo. Gh’è na ghèba en zél che no se vede … na madòna. I ciàma en taxì. Ma quel el mete le mam envanti: “Oh, che no vègna fòra che me sporché i tapetini neh … no, no, ciamé qualchedùm altri”.

La pòra Maria la và alora, co la Punto del so Bepi, vers … la trei da Trent: El Zeni, el Rossi, e ‘n dotor da Trent. Ma el Bepi el li ha messi subit en riga: “Né a far fumeghère de incens, a vender ori veci e profumi che spuza da n’altra banda, valà, che zamai ne sem rangiai”.

Questa voce è stata pubblicata in Senza categoria. Contrassegna il permalink.

Lascia un commento