NA RICETA DELA VAL RENDENA

Dopo Pasqua, Pasqueta e “Glorie” del sabo prima compreso, sentì che gh’è ancora posto nel stomèch per qualcòs? Gnente paura. L’è ora de provar el “Spisuculöch”. Cossa elo el Spisuculöch?  L’è na riceta che vei dala Val Rendena. E da quele bande Spisuculöch  vol dir “fàt coi dèi, taià a tòchi”. No avè ancora capì cossa che vei fòra? L’è meio forsi che ve diga cossa serve per quatro che magna (fè el doppi per oto, el triplo per sedese, la metà se sè sol voi doi, ensòma per 44 fè na fila per sei col rest de doi, comunque no l’è gati che vè digo de magnar).

Cossa serve:

– N’eto e mez de farina bianca

– en ròs de òf

– do patate de numer

– vinti grami de buro

– na zìgola

– mez liter de late

– en liter de acqua

– sàl quant che basta

– n’eto de formai stagionà gratà zò (meio sarìa la “spressa” dele Giudicarie. I lo ciama cosita sto formài perchè l’è pressà. E alora el va ben stagionà almen de sei mesi, tut mal podè dropàr anca el trentingrana o altri formài stagionài, gratài zò, se sa).

– bona volontà

– mezorèta de pazienza

Via alora che scominzièn. Ah, netàrse ben le man prima, vist che se dropa i dedòti…

En de na padèla fè fritegàr el buro, la zigola (taiàda a tochetini, no entrèga) e le patate (anca queste taiàde su a dadòti). Ghe sènte? Zò l’acqua, el sàl e fè boìr tut quant. Entant, en banda, fè na pasta co la farina, el ròs de l’of. Empastàr, empastàr bem. Ala fin tirè la pasta col matarèl. Che vegna fora na sfòia alta mez centimetro. Eco, adès vei el bèl. Sbreghè su la sfòia en tanti tocheti picoi. Come i vèi i vèi. Coi deì, come v’ho dit prima. E butèi zò dasiguàl nela padela (che entant l’è restàda sul fòch … no avèvo miga dit de smorzarlo me par). Misciè e cosè per zinque minuti. Prima de tirar via la padela dal foch metèghe denter el late e ‘l formài gratà. Cosè ancora per n’atìmin. Eco, quando ve par che ‘l sia pronto (no stè brusarlo per carità) portè padela e tut en tàola. Metè la padela sora qualcos che no brusa la tovàia demò. E via che nare: bisogna magnar el Spisuculöch quando l’è calt, de pu, quando ancora ‘l scòta la lengua. Cossa beverghe drio? Nosiola (vin bianch) trentin i dìs quei che ne capìs de pù de mì.