HO MAGNA’ FOR TUT

HO MAGNA’ FOR TUT

di Cornelio Galas

fallimento

Diaolporco, sì, è nà tut ‘n mona, Ho magnà for tut quel che gavévo. Domam matina, per dir, no gò gnanca n’euro  per el cafè. Nèt come ‘n pom. Come ‘l cul de ‘n bocia ‘pena netà. Nèt, osc’ia. Na vita a laorar, na vita a strussiàr. Per cossa? Per no podér gnanca méter enséma la colaziom co … la colaziom. Gnanca ‘n cafè, guaiaporcole.

Come sònte arivà a ‘sti pàssi? No ‘l so gnanca mi. No ‘l so, ‘cramento. En matrimòni nà a màl, el secònt pèzo. Fiòi, neòi, case ipotecade. Bever, fumar, far finta de viver come prima … Ah, no so quel che m’è suzès … fato stà che no gò pù gnent.

Vago ‘n giro per la zità. Come n’ebete, n’embezìl. Gò rispèt a domandar la limòsina. Me tègno a um en qualche maniera. Pur de no dar a ‘ntènder che som nèt, senza soldi e magari anca sporch.

No sòm abituà a sta vita. Na volta fèvo el grande. Giaca, cravata. Bondì dotor. Bonasera dotor. Come vala dotor? Na sposa bela, na casa bela, na machina bela, en fiol bel, en laòr sicur, soldi, magnar fora. Ades no ghè pu gnent. Giro come ‘n lumàz, cioè vago fora quando scominzia a piover e tuti i gà pressa. Così no i te varda en facia, l’è come se te fussi um … come i altri. Che de zert gà qualchedum a casa che lo spèta, che de zert no stà mal.

Som mì – se sentì i telegiornai – quel che co la crisi è restà ‘n banda. Ma cossa vot che me ne frega del Renzi, del no, del sì … l’è zà tant se no penso a butarme zò nel lach. Che po’, el so, la rogna, l’unica rogna, dopo, sarìa questa: chi elo che paga le spese de l’òbit de sto chì?

Questa voce è stata pubblicata in Senza categoria. Contrassegna il permalink.

Lascia un commento